美股唔掂，港股跟住散埋，恒指一萬大關失守，收9987，期指更加低水122點，情況唔多妥。不過，因為有大藍籌除息因素，所以實際低水冇咁多。
美股同債券大跌惹禍，但若然啲賣債券嘅錢，流到美股，美股又唔使咁悲觀，話唔埋昨晚就彈番起。港股跟美股走，即係又有太陽光出番嚟。個市咁跌法，啲Call輪自然四腳朝天，跌幅超過20%嘅超過30件，有啲可以博反彈。當然，正股若然跌多鋪，啲Call輪一樣可以繼續雞毛鴨血。
和黃（013）收49.70元，散1.55元，冇咗3%，有隻和黃Call輪上咗10大死火榜，就係9765，由31仙碌落21仙，跌幅32%，跌幅榜排第7。隻輪下月初到期，溢價2.8%，槓桿率23.7倍。和黃有隻Call輪9882，只係跌得4.5仙，跌幅10.7%，收37.5仙，12月到期，溢價8.1%，槓桿率13.3倍。如果9882跌幅係合理嘅話，則9765就跌到過火位，博反彈，揀9765。
新地（016）跌幅又係厲害，收45.80元，唔見4.2%，Call輪9740散35%，10月到期，輪價17.6仙，溢價8.6%，槓桿率26倍。隻輪溢價唔低，若然見正股拋售過度想買Call輪博反彈，9740風險仍然好高，正路對象始終係9799，隻輪10月到期，輪價64仙，溢價1.3%，槓桿率7.2倍，數據實際好多。
章盛