大市噚日裂口低開低收，3個重要支持位，包括10日線（10104）、20日線（10082）同上升楔形的下支持都跌穿，恒指低收9987，大跌189點。成交增至111億元，大成交而跌穿形態支持，形勢向淡，除非短期上番去。
成交咁大，單係中移動（941）同滙豐（005）已各自有11億元，中移動排頭位，好淡鬥得激烈，全日在20元高位同19.5元低位間快速上落，好友不時出招，由低位連掃六七檔到高位，約略計埋有四五次之多，收市19.75元，屬於中間價，雙方算係打成平手，但係如果個市真係睇跌，好友使唔使咁樣掃貨先？
除QDII外，人民幣升值的趨勢對H股亦有利，因日後每股盈利和派息折算為港元會有滙兌增益。人民幣現時已面臨主要貿易夥伴施加的升值壓力，相信明年開始會逐步升值。
踏入8月，國企中期業績陸續宣布，唔少有A股上市的國企已宣布季績，盈利普遍有理想增長，特別係鋼鐵股同石化股，更可用「突出」來形容，例如馬鋼（323）第一季淨利潤4.93億元人民幣，增6.4倍；上海石化（338）首季就虧轉盈，賺3.08億元人民幣，相信呢兩類國企的中期業績都會有強勁表現。睇完業績後，再揀選投資對象，預測PE10倍至12倍者，買入；8倍至9倍者，強烈買入。
恒指雖大跌，國企榮辱互見，逆市而升者，有鎮海煉化（1128）、安徽海螺（914）、哈爾濱動力（1133）同廣深鐵路（525），至於鋼鐵、石化同電力股就普遍下跌幾個位。國企股急升後，出現調整好正常，但每一次調整，都是趁低吸入的好機會，下半年，國企仍然係投資的主力對象。
比聯噚日推出3隻國企指數認購證，佢哋指內地經濟高速增長，外來投資愈來愈多，而流入國企的資金亦不斷增加，由於內地快將實施QDII計劃，H股與AB股折讓將會收窄，有利H股股價上升。事實上，現時基金揸重國企，嚴格來講，呢個升浪佢哋不斷加磅，對後市睇得好好。
郭兆誠