大家都知今場波嘅門券早就被搶購一空，搞到有好多球迷買唔到飛。所以噚日喺開波前一粒鐘，喺紅館售票處外就有近百人排長龍，希望有觀眾臨場退飛，不過據小記所知，只有極少數退飛，睇嚟呢班球迷大部份都要失望而回。
姚明嘅魅力果然非同凡響，噚晚整個紅館座無虛席。大會亦好識得搞氣氛，學足NBA比賽一樣，凡叫暫停時，都安排一班穿上性感衣着的啦啦隊女郎大跳勁舞助興，加埋啲強勁音樂，真喺似開嘉年華會重多過似打比賽。
主辦單位噚日專登搵咗商台DJ森美做司儀，喺開賽前介紹各球員。當介紹到廣東宏遠前鋒朱芳雨時，森美見佢打廣東隊加上佢廣東話講得好流利，就話佢喺廣東人。廣就廣喇，不過唔喺廣東而喺廣西。身為大會嘅司儀，好心森美做好啲功課喇，無謂貽笑大方。