繼日前我哋報道過有關新一代寶馬M5高性能房跑車嘅消息後，最近又收到消息，話廠方正有意為快將推出嘅新一代6系，推出M系高性能版本，並預計於2005年底正式登場，而主要對手包括有保時捷911Carrera、平治SL55AMG等多款跑車。
該消息指出，全新M6高性能轎跑車將會以新款635CSi型號作為設計平台，故外形看來與普通版相近；但當細心留意下，定能察覺到新車裝有看來霸氣十足嘅車頭氣霸、巨型跑車合金胎軨、車身兩側裙腳、雙排四出式尾喉等等，一份高性能跑車形象絕能徹底地展示出來。同時亦有傳廠方會為其推出輕量版，其中車身多部份會採用碳纖維作材料，據說車廂配搭亦具有一份跑味，但仍有待廠方公布有關資料後方可作實。引擎配搭方面，則相信與早前我哋曾作介紹嘅新M5相近，採用一台全新5.5公升V10偈，馬力輸出動輒高達500匹，難怪新車0-100公里僅約5.0秒，極速更可高達240km/h咁快啦！有興趣嘅車迷，記住留意新車嘅推出日期喇！