息魔陰霾乍現，令到美股大跌，拖累港股噚日亦大跌189點，收報9987，成交逾111億元。即月期指勁插245點，收9865，低水122點。現時市場擔心資金會由股市流返債市，早前美股及港股上升，主要是由資金帶動，非看好經濟增長，一旦資金流向債市，股市肯定受靶。唔好忘記，恒指近期低位在8331。
合和公路（737）首日上市遇到港股大跌，股價一度低見3.825元，較招股價低8%，最後收報3.925元。合和公路股息率大約有5.7%，略高於30年長債孳息率，所以重未夠吸引。
裕元（551）自從1拆2後，股價升近1倍，今次輪到新灃（1223）玩拆細，而且重係1拆4，唔知會唔會升夠兩倍？股民有理冇理入市追捧，刺激股價勁升12.74%，收8.85元。不過，大家唔好忘記裕元能夠倍升，主要係基金追捧工業股，同埋佢晉身藍籌股與摩指成份股有莫大關係，新灃現時市值只得18.4億元，好難做到主要指數成份股，出售Converse權益雖然有錢賺，但來自Converse嘅保證定單則存在不明朗因素，芬佬會否繼續捧場，實在好難講。
華寶大中華（810）噚日大幅波動，一時急跌58%至0.10元，一時急升25%至0.30元，最終搞到停牌，公司話有股價敏感消息公布。同日有另一宗消息，華寶大中華持有13%之Koring需要股東注資，但佢就未有依期出資，違反股東協議，𠵱家傾緊點收科。
阿虎