葉劉急流勇退辭去保安局局長一職，之後就陪囡囡飛咗去美國，大家以為佢出國避靜，但原來佢已經靜靜雞返咗嚟，八方噚日去灣仔君悅湊熱鬧捧吓皇馬場，點知見唔到碧咸，卻撞破葉劉同中央政策組顧問、曾鈺成細佬曾德成密會。
只見兩人雙雙由君悅方向行去會展，葉太一身迷人粉紅色，打扮比之前更突出，下身着條貼身牛仔褲，上身就粉紅色貼身Top加件粉紅色皮褸。葉太看來氣色唔錯，至少唔係個個人受得住三十幾度着皮褸咁刺激。
曾德成同葉太密會傾乜呢？兩人都三緘其口，不過葉太就好親民咁同一位碧咸迷影相，又問個哥哥仔係咪等皇馬，不過佢話自己同個女都唔睇波，冇乜留意皇馬動向，之後就匆匆上車離去，曾德成亦雞咁腳鬆人，八方轉個頭已經唔知佢閃咗去邊。
葉劉離港前工聯會幫佢搞咗個英雄式歡送會，據聞民建聯噚晚亦請佢食海鮮，話晒民建聯幫葉太擋咗唔少箭，𠵱家事過境遷，大家終於可以坐低食餐安樂茶飯，至於飯局有冇商議23條大事，有份食嘅人話只談風月，不談政事喎。
傳真︰2623-9278
電郵︰