日本話題電影《大逃殺》，大前年喺日本好受注目，三年後嘅今日，大導演深作欣二遺作嘅《大逃殺II》，下個星期四就會殺到嚟本港。我大口羅拉啱啱睇咗電影嘅原裝預告片，由於太過血腥，電影公司要刪剪啲暴力鏡頭，個預告片先至可以播出街。
《大逃殺II》嘅古仔玩得比上集更加激，上集由藤原龍也飾演嘅唯一生還者七原秋也，同埋前日亞季扮演嘅中川典子逃出荒島後三年，原來秘密成立咗反BR法組織「七原組」同政府對抗，連靚女加藤夏希都加入做頭號狙擊手。而軍方竟將幾次恐怖襲擊嘅罪名加喺佢哋身上，於是安排新一次「大逃殺」對付佢哋！
今次被迫要玩「大逃殺」嘅係鹿之砦中學三年B班學生，佢哋嘅任務係三日內喺荒島嘅基地，鬥快殲滅七原秋也同佢嘅黨羽，最激係今次加入咗更殘忍嘅新規則，相同學號嘅男女學生被編成兩人一組，喺預告片入面已經見到其中一個男學生被殺，同一學號嘅女同學嘅頸圈即時爆炸，條頸爆開，血如泉湧，死狀恐怖。睇嚟今次呢個遊戲，特登設計到血肉相連，有心做到趕狗入窮巷，迫住大家為生存互相殘殺，所以今次噴血嘅程度應該會更加犀利，唔通觀眾要帶定嘔吐袋入場？