兩年前，鑽石山大磡村清拆，詠藜園高調遷進黃埔，但另一強勁食肆，一日賣過五百碗車仔麵嘅友記就從此銷聲匿迹；兩年後，友記重出江湖喺黃大仙重開，全因一直嫌整車仔麵辛苦，唔肯繼承父業嘅袁仔鳥倦知還，決定跟隨袁老先生學藝。袁仔由熬湯底、燜牛腩都盡得袁老先生真傳，加上$10三餸麵嘅超平價，希望可以喺黃大仙再創車仔麵神話。
記者：馬慶武 攝影：陳盛臣
天未光晨早5點起身熬湯底燜牛腩，做到7點半關門後重要埋數至9點，一日做足16個鐘，難怪袁仔之前一直都怕辛苦唔肯繼承父業。其實幾年前，友記重喺大磡村嘅時候，袁老先生已經問過袁仔有無興趣學佢一手廚藝，不過當時袁仔情願去做辦公室助理都唔願喺廚房捱，直至數月前，袁仔才鳥倦知還，終於決定承接老竇整車仔麵，更加入地道茶餐廳奶茶咖啡茶餐食品，希望生意好啲，可以此為終身職業。
𠵱家再問袁仔整車仔麵辛唔辛苦，佢話：「辛苦！重成日俾老竇鬧，不過我會堅持落去，絕對唔會半途而廢。」
「開頭學，試過整咗煲牛腩出嚟，又韌又無味，咪俾老竇鬧咗成日囉。」袁仔話由初學到𠵱家都係兩個月左右，「最難學都係調味，落調味料落多少少或者落少咗已經可以完全唔同味。又好似溝專程由斯里蘭卡訂返嚟嘅紅咖喱粉時，水嘅份量又好緊要，溝出嚟要香辣得嚟唔搶喉，真係幾難。」𠵱家袁仔都已經逐漸掌握調味嘅竅門，不過為咗保證友記招牌車仔麵嘅質素，袁老先生仍會親自落場，始終袁仔都重係學嘢階段。
整車仔麵經驗達40年嘅袁老先生，街坊都叫佢老袁。起初友記只係喺黃大仙擺街邊擋，直至約8年前才搬到大磡村木屋，當時全盛時期一日可賣超過五百碗車仔麵，連食家蔡瀾都喺專欄介紹過。不過兩年前清拆之後，因為未搵到合適舖位，又想唞吓，所以都無開新舖，呢年幾兩年都係去吓旅行休息一下。「𠵱家個仔肯接手就梗係好啦，承繼有人，不過佢都要學多一排先可以盡得我嘅真傳。」老袁搵到阿仔做繼承人當然老懷安慰，更開心係有機會見番啲幫襯咗幾十年嘅老街坊。
大磡村友記
電話：23288109
地址：黃大仙鳳凰新村銀鳳街22號地下
營業時間：7:30am至8:00pm
(只限周末周日供應)
牛韁嘅牛肉味比牛腩濃厚好多，就算燜足6個鐘，肉質亦較牛腩硬，不過韌得嚟極具咬口，愈𡁻牛味愈濃，口感味道都好獨特。