在無綫新劇《律政新人王》中飾演律師Vincent上位的陳鍵鋒，兒時十分百厭，試過右手插玻璃，左手斷骨。他更曾在九龍仔公園內被劫去五十元，結果一星期沒有零用錢使。
在播放中的無綫劇集《律政新人王》飾演Vincent一角的陳鍵鋒，砌低有份演出的林峯和麥浚龍（Juno），人氣急升。
陳鍵鋒父親是牧師，小時候的鍵鋒又好動，不時與兩個家姐玩打交，就算時至今日，他與年長七歲的大家姐見面，偶爾也會動手動腳，隨興之所至來場搞笑格鬥。
回憶十歲那年，陳鍵鋒曾遇劫，令他畢生難忘，日前他在電話中說：「嗰次我同啲朋友去九龍仔公園游水，點知喺公園遇到幾個大我哋小小嘅哥哥，佢話佢哋係黑社會，叫我哋攞晒啲錢出嚟。
「咁我哋驚嘛，咪畀咗五十蚊佢哋囉，好彩有個朋友好醒目，靜靜雞拉咗個男人過嚟扮警察，嗰班人先至走。之後我哋驚佢哋喺門口埋伏，所以咪行山路走。我都唔敢將呢件事講畀屋企人聽，自己成個禮拜都冇零用錢使，真係慘。」
原來陳鍵鋒兒時十分百厭，他的左右手都曾受傷，他說：「以前我係由奶媽湊大，住喺佢屋企，但係我細個太活潑，有次喺佢屋企跳梳化，唔知點跳咗落地下，左手鋤咗落地，斷骨㖭，醫咗成兩、三個禮拜至好番。」
傷完左手，未幾又整傷右手，陳鍵鋒說：「細個嗰陣我同家姐好想去街，所以咪成日話攞啲可樂樽去攞番按樽錢，咁就可以乘機出去。
「有次我攞住啲樽，同家姐行到屋企樓下個停車場時，自己就好白癡咁fing啲樽，結果啲樽fing咗埋牆，成塊三角形嘅玻璃就插咗落我右手手臂，狂流血啦！嗰次阿爸好英，一手拉我去醫院，縫咗八針，到𠵱家重有疤痕呀。」
採訪：朱芷瑩
