張栢芝、古天樂前晚喺九龍塘拍電影《忘不了》外景，場戲係講栢芝、古仔同埋個童星原島大地，一家三口好溫馨咁洗小巴，栢芝件戲服本來都冇乜唔妥，不過因為佢件Ｖ領衫個領太大，當栢芝俯身攞水桶入面塊毛巾時，就走晒光。
不過栢芝都好醒目，見到有記者影相，就知道自己梗係走咗光，於是急急腳去攞番件藍色外套嚟着都嫌唔夠，再整多個斜孭袋喺胸前，驚死又走光，雖然係春光乍洩，不過栢芝心情唔錯，同個童星喺小巴度玩得鬼咁開心。
而佢同古仔重有場喺小巴裏面嘅求婚浪漫戲，之後再拍多場古仔撞車死嘅場面，但係導演爾冬陞話呢場戲要保持神秘感，所以唔畀影相，不過佢哋要喺條街度拍，惟有叫工作人員用布封住所有可以俾人見到嘅地方，想知道古仔點死法就要睇戲啦！
莫文蔚（Karen）攞咗台灣金曲獎「最佳女演唱人」大獎，年代經理人公司同Sony唱片公司日前幫佢安排咗一個神秘慶祝會，重特別訂做咗一面足金金牌、一個三磅蛋糕，同埋二百朵玫瑰花送畀Karen，Karen梗係好開心啦，佢話當晚喺張學友同楊采妮手上攞獎時，因為太興奮，最後連手提電話都唔見咗。
台灣玉女歌手蘇慧倫同內地樂隊羽泉前晚喺將軍澳電視廣播城錄影《超級紅人館之台慶三響炮》節目，蘇慧倫已經好耐冇嚟香港，佢話𠵱家忙緊拍台灣電視劇同錄新碟，喺套劇入面自己飾演一個女同性戀者，重會有接吻戲㖭，所以既要同女人錫，亦要同男人錫。拍嘅時候佢就當對手係情侶咁，幫自己全情投入喎。
四哥謝賢噚日出現喺中環，佢話聽晚皇馬嘅賽事已經有飛在手，問佢王菲今日生日佢會有乜表示？四哥話：「唔關我事，我不嬲唔理後生啲感情事嘅。」至於有報道話佢同拉姑情未了，四哥大大聲咁話：「係情未了，我同佢個仔都未大，我同阿Kong咁老友，唔怕佢呷醋，關佢哋（指雜誌）交叉事呀？」
孫燕姿稍後會推出新歌加精選大碟，佢日前喺台灣接受《ELLE》雜誌訪問時話，推出完精選碟算係階段性告別，咁啱佢同華納唱片嘅合約喺今個月屆滿，所以佢打算一年內唔再出碟，好好思考一下未來路向先再算。面對未來嘅心情，孫燕姿坦言係百感交集，但好多謝男友丹尼斯一直喺身邊陪伴。
