今年二月在洛杉磯註冊結婚的童愛玲，於三月時在尖沙嘴洲際酒店補擺婚宴，前晚童愛玲挺着大肚子獨自從上海返港，原來她已經懷孕六、七個月，預產期在年底，稍後她更會到台灣待產。而許秋怡就於昨午在九龍法國醫院剖腹誕下男嬰。
童愛玲自結婚後一直陪伴在上海工作的丈夫王敦民，前晚童愛玲獨自從上海返港，只見她精神奕奕，明顯胖了不少。而童愛玲前晚見有記者在場十分愕然，但當記者上前恭喜她榮升母親時，童愛玲亦難掩心中喜悅，她說：「我有咗六、七個月，應該係結婚嗰時已經有咗，我同老公一知道呢個消息都好開心，而且佢重緊張過我，好似今次返嚟香港搞啲私人嘢咁，佢就唔畀我拎咁多行李，因為佢要喺上海返工，所以佢今次冇陪我返嚟，但遲啲佢會陪我返台灣待產。」
而童愛玲表示因為母親在台灣，為了方便有人照顧，所以她會留在台灣待產，不過到時最辛苦的反而是童愛玲的丈夫，她說：「因為到時佢要每個禮拜上海台灣兩邊走，其實我哋都有諗過喺香港生，但係真係冇人照顧我。」
對於將為人母，童愛玲表示完全不覺辛苦，還笑言脾氣好了不少，但就嫌自己肥了不好看，她說：「我真係肥咗好多，之前我係一百二十磅，𠵱家就肥咗四十磅，我覺得自己好似一隻企鵝咁要八字腳行路，因為我乜都食，又冇戒口，西瓜都照食。」
至於希望BB是男還是女時，童愛玲立即說：「我就想生女，我老公都話冇所謂，其實我已經照咗係仔定女，不過我就想保持神秘，但係我哋都各自諗定細路個名，等到最後一個月時先一齊再揀。」
此外，許秋怡昨日下午四時多在九龍法國醫院開刀誕下七磅十一安士男嬰，母子平安，剛榮升父親的王書麒難掩喜悅地說：「醫生話秋怡嘅傷口會好快復元，而我第一眼見到BB個樣覺得佢好招積，佢喺度𠵱𠵱呀呀，似足秋怡唱歌一樣。」
秋怡昨日中午突然穿羊水及見紅，由父母及王書麒陪同下驅車送往醫院，秋怡甫進醫院表示心情很緊張，而書麒則笑說：「佢好似預知今日會生咁，今朝六點幾重叫個工人炒咗碗特大豬油撈飯食，因為手術之後就冇啖好食。」
採訪、攝影：駱華齡、馮美茵
