雖然話市道唔好，地產代理生意難做，但亦有代理逆市突圍。長實今年三月開售畢架山一號，委託各大代理促銷，美聯物業承造呢個豪宅新盤，成績唔錯，噚日發展商就頒獎畀做得出色嘅員工。
又一村分行客戶經理蔡繼志做得最多成交，有十一宗，當中有四個係複式，每個超過二千萬，全部成交總值一億一，係蔡生入行十二年嚟，成交最多宗數嘅新盤。聽聞，佢個人佣金有五十幾六十萬，認真和味。
聽蔡生講，佢嘅客有七成係廠家，從事製造業、玩具同埋鐘表業，大部份嚟自又一村。佢入行到𠵱家都主攻呢個豪宅區，種咗唔少根，知道唔少實力買家咁多年無炒過樓，無輸過錢，佢就主力以呢類客源做目標，成功做出理想成績。
唔少香港人都篤信風水，尤其生意人，更加寧可信其有，不可信其無，買樓會搵風水師指點吓。部份發展商捉住呢種心理，賣樓前先請堪輿大師為樓盤贈番兩句，等啲客買得安心。
除咗大型發展商會咁做，𠵱家連細發展商都唔執輸，北角單幢新樓景愉居，噚日搵咗堪輿家楊逸康到場，向記者講解幢樓，甚至成個北角區嘅風水，楊生話北角區利文昌，所以有咁多好學校。沿岸見水嘅物業，風水特別好，不過，填海會影響風水，望住填海區，同住填海區嘅樓宇，都唔多理想。
西班牙足球勁旅皇家馬德理抵港，全城哄動，好多人都想近距離一睹佢哋嘅風采。中原一姐劉瑛琳有皇馬一眾球員「陪」食飯。原來一姐噚晚訂咗尖沙嘴半島酒店Felix，請七月份做到相連同複式連平台「空中居庭」單位嘅同事食飯，總共二十六個，咁啱皇馬球員都嚟呢度飲嘢，如此近距離見面，成班同事極度開心同興奮。
中原今次為做到「空中居庭」嘅同事，安排嘅特色晚宴，估唔到有咁特別驚喜。
一姐話，代理做到一間，經理級就要分行做到兩間，同董事所屬區份做到六間先可以獲邀食飯。做到嘅「空中居庭」包括紅磡海逸豪園、荔枝角盈暉臺同鑽石山星河明居等樓盤。
發展商為咗鼓勵代理努力促成買賣，好多都設獎金制，最快達到指標嘅代理就可以得獎。𠵱家連代理行都搞埋一份。
今個月開始，市場會有唔少豪宅新盤推出，香港置業即時搞個「雙雄現金大獎賞」。
董事胡日發講，賽制共分三個階段，每十日一個，每階段最先做到三十萬數嘅兩個組別，可以各得五千蚊獎金。胡日發話，之前都搞過「強中之強」大獎，成績唔錯，所以今個月再設獎項，以良性競爭來提高士氣。
賣樓一定要有噱頭，好似長實宇晴軒，今次重點推介幾個連平台花園嘅單位。負責發展策劃同室內建築設計嘅何定豐話，住客通常會將平台作晾衫用途，佢哋覺得好嘥，所以今次送埋裝修設計畀買家，重會有專責小組，負責幫買家度身訂做平台花園嘅設計，有歐陸式、日式供選擇，旨在幫買家整靚個私家平台。
不過，香港一般家庭始終都喜歡喺戶外曬衫晾被，花園平台又確實係幾理想。
何定豐話，靚靚嘅平台一樣可以晾衫或者擺洗衣機，不過襯番個精緻嘅花園設計，晾衫都可以好有品味。
蘭西
電郵地址：
