港股噚日大跌189點，但經紀黃推介嘅光宇國際（1043）十分硬淨，上升1.59%，收3.20元，成交有成1940萬元咁多，並唔係乾升。
經紀黃話，睇見隻股咁嘅款，似乎唔係乾炒咁簡單，或者會有動作跟尾。
不過，大市已經跌咗幾日，唔知會唔會轉弱勢。早排有唔少股仔都搞路演或帶團睇廠，未去之前，股價多數大升一輪。上市無耐嘅華園控股（2349）在本周五帶傳媒返廣州睇廠，但噚日亦跟隨大市下跌，收0.94元，跌咗2%，真係開車得唔着時。
經紀陳話，華園除咗係賭王個仔入主某證券行後首間上市公司外，亦同時係一位股壇大佬轉工後首隻力作。雖然上市之初，股價一度跌穿0.85元招股價，但好快已經升番上去，最高重見過1.03元，之後華園股價一直高於招股價，不過無論成交量及氣勢都平平，所以幕後人加把勁催谷，係好正常嘅事。
小初對食品股有偏見，主要覺得競爭太大，而收數期又長。
慕容小初