滙豐（005）盤數，係人都話靚，早段高見98.25元後，低收96.75元，升得1元，有啲令人失望。不過遲早會反映業績，大行出報告推介，揸定錢揀Call輪買可也。
恒生（011）半年少賺3.8%，但股價反應好過滙豐，收84.75元，有進帳1.25元。恒生Call輪唔多，隻9911算係有啲成交，收25仙，升3.7%，有5球易手。隻輪明年4月到期，溢價5.5%，槓桿率高達33.9倍。咁長壽命，咁高槓桿率，去到尾如果正股升得唔錯，揸隻輪可以發財。假設正股到時升10%，隻輪就升150%；正股到時升20%，隻輪就升490%。不過，恒生係高息股，隻輪到期之前，正股獲派6.4厘息，所以隻輪溢價實際高過表面5.5%好多，而正股亦唔輕易上升十幾二十蚊，所以隻蛤乸唔係大得好緊要。
滙豐中期多賺25%，中銀（2388）估計好難有咁嘅成績，可能因為珠玉在前，或者滙豐咁正成績都只升1元，中銀回落15仙，收8.25元。
兩隻中銀Call輪散得算厲害，9794冇咗19%，9860唔見15%。9794今年10月到期，輪價32仙，溢價5.5%，槓桿率25.8倍。9860明年3月到期，輪價67仙，溢價5.1%，槓桿率12.3倍。本港銀行可以開辦人民幣業務，中銀必然最最受惠，中銀股價若然再跌，不妨小兜Call輪，咪貪槓桿率較勁嘅9794，始終壽命較短，應吼9860，年期上着數好多。
章盛