謝霆鋒、許志安和陳奕迅等昨日跟DJ隊舉行足球賽，腳部受傷的霆鋒擔任龍門，令歌星隊頻頻失分，幸最後仍以六比五險勝。霆鋒辯稱對手明知他有傷，故意勁射令他失平衡，然後執死雞入球！
許志安、謝霆鋒、陳奕迅和梁漢文等昨日在沙田為「903全運會」踢五人足球賽，與ＤＪ隊對壘。擔任龍門的霆鋒，昨以紗布包裹早前受傷的左腳，由於他頻頻失波，以致歌星隊在第一回合以一比四落後；隊長安仔見狀即改由鄧健明任龍門，結果歌星隊追成四比四；第三回合霆鋒再任龍門，最後歌星隊仍以六比五險勝。
霆鋒對於在他手上失掉五球，他說：「我唔會賴，對方知我受傷，就重炮射過嚟，等我失重心，然後執死雞入波。」
在比賽中有入球的陳奕迅，攻門時不慎跣倒受傷，要以冰敷腳，後來他竟以敷腳水倒向安仔和霆鋒等人，十分核突。對於霆鋒頻失球，Eason說：「佢傷咗嘛，啲波好難救㗎，皇馬龍門卡斯拿斯都未必救到啦，佢都試過救波，搞到條褲好似俾葉繼歡掃過咁。」
安仔前日與蘇永康出席記者會時，被指不滿康仔搶風頭而互窒，安仔昨說：「我哋冇心病，我今日打電話畀康仔，佢都話我冇黑面，我哋成日互窒嘅。」
此外，有傳謝霆鋒被飛出太陽計劃閉幕禮，監製周國豐昨在港台說：「名單上確係有霆鋒個名，有關方面唔算太抗拒。我知道霆鋒個期已經度咗，𠵱家只係等答覆。」
而蘇永康自去年在台灣發生「搖頭丸」事件後，至今未參與過太陽計劃活動，周國豐說：「我哋唔知佢呢個時候係宣傳期，可以再傾吓。」而太陽計劃原本於本月十六日在蘇州舉行活動，霆鋒、陳小春和張栢芝將出席，但因水災要延期至下月二十日。周國豐說：「原本十六號嘅活動有搵過王菲，𠵱家會再問吓佢改期去唔去到。」
採訪：駱華齡、王連連
攝影：陳偉權
