李彩樺（阿Rain）老竇欠債要女代還，大家以為阿Rain好唔掂啦，但佢最近成日俾人影到同阿媽去shopping嘅相，又要還債又要買嘢，支出咁大梗係要搏命搵錢啦。
據馮仁昭所知，阿Rain早排得唐安麒贊助瘦身同美容，但就冇幫對方拍廣告，點知最近佢為咗賺錢，接咗減肥堂嘅瘦身廣告嚟拍，重已經拍埋㖭，不過就搞到一鑊粥咁。
係人都知阿Rain一向以玉女形象示人，不過接得瘦身廣告，點都要着得性感少少，畀人知你減磅成功唔再係「肉女」，但阿Rain就好錫身，廣告商唔使佢着泳衣，但就安排咗啲性感衫，點知阿Rain對啲衫唔多滿意，呢樣唔着嗰樣又唔得，最後只係肯着件吊帶背心同短褲影相，呢啲衫平時唔拍廣告都成日着㗎啦，廣告商點解要畀錢你嚟着啲冇乜特別嘅衫？雖然最後輯廣告相都拍咗，但據聞廣告商就好不滿阿Rain嘅態度囉。
三位CATGIRL黃美妍、張碧珊及夏詩韻舊年參加CATGIRL競選加入有線做主持，吸取年幾以嚟嘅經驗以後，佢哋𠵱家正式宣布學成畢業，而節目亦都圓滿結束。有線方面為咗賀三位靚女告別，專登喺最後一次錄影時送上大蛋糕，寓意佢哋可以順利繼續喺娛樂圈大展拳腳。
朱茵噚日喺港台接受訪問，剪咗一頭短髮嘅佢睇落好清爽。通常男仔都鍾意女朋友留長髮，朱茵嘅男友黃貫中係咪有同感？朱茵話：「我冇理過佢喎，相信佢會支持我嘅。而且頭髮可以留番長，如果連髮型都唔可以變吓，咁人生咪冇晒樂趣？」朱茵𠵱家籌備緊九月出新唱片，佢話：「歌已經錄好晒，形象方面都係以清爽為主，希望製作連宣傳費，可以唔過百萬啦！」
蔡慧敏早前同廣告商打官司，搞咗一輪噚日終於喺灣仔法院有咗判決，法官判雙方和解，蔡慧敏話對結果都好滿意，但和解條件唔可以透露，佢話：「都鬆一口氣，件事纏繞咗咁耐，終於可以放鬆，我以後會睇清楚啲合約嘅嘢。𠵱家可以專心去台灣做嘢，因為之前接咗個甘油廣告要去拍呀。」
黃秋生噚日出席喺尖沙嘴舉行嘅記者會，而亞太同奧斯卡影展香港參展名單已經有定案。講到近期忙於拍電視劇《功夫足球》，佢就話內地啲安排好差，造成浪費資源，同場出現嘅老闆林小明就話冇問題：「冇收過投訴，小題大做啫。」不過佢哋大家都係為部戲，秋生同老闆後來重大方合照。
蔡依林噚日接受港台節目《開心日報》訪問時，提起俾新城推上台同緋聞男友周杰倫合照嘅事，佢話並冇受到傷害，重話唔介意合照㖭：「對呀，沒有關係。」蔡依林又表示，其實想出席慶功宴，不過公司安排佢返酒店，其間佢話自己鍾意碧咸呢類運動型嘅男士。
