呢頭有傳聞話搞唔成，嗰頭又有漫畫參展商高調宣布唔玩，就連曾經令萬人擔晒櫈仔排頭位的兵器熱潮都過埋，唔通今年漫畫節真係要慘淡經營？咁又未必，至少兩大台柱「玉皇朝」及「天下」繼續撐場，推出會場版精品益吓漫畫迷，同時大會新增設X-Zone地攤、BandSound、Graffiti、HipHop等潮流元素，成為今年漫畫節的重頭戲，唔講咁多，睇完以下精選推介後，即刻飛身會展見。
記者：尹珊珊 攝影：梁細權
制服誘惑
還以為空姐放工後，應該鍾意打扮靚靚蒲吧唱K風花雪月，外形端莊亮麗的羅栩怡，踏出機艙、脫下制服後，卻嗜愛換上一套又一套漫畫人物服飾，沉醉在Cosplay的世界裏。第三度參加漫畫節扮嘢大賽的她，曾是第3屆亞軍得主，贏過雙人日本機票，換上《太空戰士II》赤魔道士的作賽戰衣，盡顯斯文以外野性俏皮的一面。
「Cosplay最好玩的地方，就是可以透過不同的角色扮演，做盡現實生活中做不到的事。」就是因為愛玩，四年來家中已儲有七、八十套漫畫服飾，難得是背後有個勞心勞力的模範媽咪，愛扮哪個漫畫人物，羅媽媽都會出手相助。「漫畫人物服飾始終都唔係畀真人着，真實去做要靠經驗同想像力，好似有時淨係得正面，便要用想像力去估件衫背面係點，又要搵啱合適的布料，重要襯埋假髮同彩色隱形眼鏡，少點心機都唔得。」幸好羅媽媽的勞心並沒有白費，今年羅栩怡順利躋身總決賽三十名內，想知勝算如何，等到今個星期日自有分曉。
漫畫人物總決賽10/812:45-14:00
2003香港漫畫節夏日Fun墟
地址：香港灣仔會議展覽中心1號展廳
查詢熱線：23440415
日期及時間：8月6日至9日上午10時至晚上9時；8月10日上午10時至晚上8時。
門票：$20（家長可憑門票免費攜同一名小學生或身高四呎以下兒童入場）
雖然今次是歷屆最少漫畫出版商及漫畫家參與的一年，但是仍有不少漫畫商推出會場版精品及新書，滿足渴了一年的漫畫迷，記住帶足銀両掃貨！
玉皇朝
今年兩大台柱都不約而同大玩Cutie公仔，「玉皇朝」代表有龍虎群英彩色布偶布公仔，高約4吋，配埋匙扣，每個$40；另有10吋高問天錄音公仔，售價$120；重有歷代天子彩色人形十周年紀念版，售價$30。新書方面最矚目係由美國「DCcomics」正式授權香港版《蝙蝠俠》，由黃玉郎親自執筆，更創作了一個叫「夜龍」、代表東方的英雄角色，如無意外應該是今次漫畫節的重頭作。
天下
鄺氏新漫畫
鄺氏新書《千賭神皇》以世界賭皇大賽為骨幹，帶出年輕人奮鬥故事，普通版$14，創刊會場紀念特別版附送電話繩，每本$18。
東立
兩年前「東立新人獎」由本地年輕人馮展鵬奪得亞軍，更成為「東立」的力捧對象之一，今個漫畫展將會推出新作《獵殺天讎》，每本$30。
雖然《無間道2》重未上映，嘜頭精品已火速登場，購買限量版《無間道》精品同VCD時，重會有環保袋、筆筒、月曆等精品送；連Postcard及電話繩的《無間道2》精裝電影前賣卷，亦會率先在會場發售。8月7日下午3時至3時半，陳冠希同余文樂重會到場舉行簽名會。
夏日FUN墟
潮流熱玩
漫畫節除了繼續以夏日FUN墟為主題，更首次加入第一屆「Band&DanceHK2003青年音樂祭」，讓大家可以體驗漫畫以外的文化。重頭戲有TheOne舞蹈大賽，由香港不同的舞林精英，分HipHop、Jazz同B-Boy三組比賽，由商台Inti主持的「組Band時間」亦會進駐漫畫節，現場直播兩小時Band壇資訊的同時，重會號召數十隊由年輕人組成的樂隊，每日輪流表演助興。話時話漫畫節前身係由書展分拆出來，唔知幾年後青年音樂祭又會唔會同漫畫節一樣，獨立成為一年一度的大Function呢！
Graffiti
平時見到的Graffiti塗鴉藝術，唔係街頭某一道牆，就係T恤上面的圖案設計，但今年漫畫節話晒以展現創意做主題，點都會搞吓新意思。於是找來一班Graffiti愛好者用家具，推動Graffiti這種街頭藝術文化，所有收集回來的作品都會在會場展出，等你可以感受吓今日年輕人的創意，至於冠軍作品將會在星期日下午6時45分公布。
X-Zone地攤
今年漫畫節以展現創意為主，所以特別在X-Zone內，增設一百檔創業地攤，等班後生仔可以一嘗創業滋味，有份擺檔的Ivan就話：「漫畫節人流多，又可以更了解年輕人口味，$600租一日試得過。」將升讀理工大學的他，早年將絕版同外國搜購回來的LEGO貨品擺上網賣，生意多到足以同朋友在山林道合資開設玩具舖，今次開檔自然帶埋唔少鎮店之寶助陣。同場重有自創品牌、潮流服飾、手作仔玩意、B女（Bylthe）衫等售賣，就算以前無去開漫畫節，總之鍾意夠潮又夠IN產品都應該去睇吓。