盛傳會在日內面世嘅「小小小超人」，睇嚟已經誕生。話說長和系主席「超人」李嘉誠嘅媳婦王富信入院待產，初時曾傳呢一胎（第三胎）係仔，但最新消息就話係千金；而記者喺養和醫院守候多日，噚日終於見超人家族成員現身。
首先係「小小超」李澤楷在下午三點幾坐住佢架Audi座駕抵達醫院。小小超一見記者就笑容滿面，重企定定任人影相。問佢大嫂王富信個BB係咪啱啱出世？係仔定女？佢就一直笑住唔答。不過記者恭喜佢時，他又好客氣咁話：「多謝晒。」問佢BB改咗個乜名？小小超就話：「留返畀佢哋（指大哥李澤鉅）啦。」佢逗留咗十幾分鐘，就坐番架Audi離開。
到四點八左右，一架平治房車抵達，車內除咗有保鑣外，坐喺後面嗰個就係誠哥，佢逗留咗半個鐘左右，原本喺停車場位置出車，見有咁多記者，個司機就好醒目咁喺另一個出口開走咗。到六點左右，又見兩架車離開，一架保鑣坐，另一架就坐咗新任爸爸「小超人」李澤鉅，佢面露笑容，見記者追佢架車時重叫記者小心啲。過咗冇耐，陸續有花籃送到，祝賀超人家族第三代新成員降臨。
傳真︰2623-9278
電郵︰