好多明星都係對人歡笑背人愁，好似近期舉行演唱會狂冧師奶嘅SMAP咁，佢哋嘅隊長中居正廣，呢排原來已經同佢個OL同居女友分咗手，重搞到佢成個人落晒型咁，唔只成日傷風感冒醫唔好，重俾狗仔隊目擊佢經常搵朋友返屋企陪佢解悶，一個人嗰陣重慘，只得煙酒相伴，真係幾鬼可憐。
日本雜誌《周刊女性》嘅狗仔隊，近排鎖定中居正廣為偷拍嘅目標，除咗周圍收料之外，亦周不時喺中居屋企門口昅到實，睇吓佢呢排感情生活係點。班二五鄰居向雜誌爆料，話呢排已經冇見到中居個OL女友出嚟買餸，更加唔見佢架單車，睇嚟佢哋兩個已經玩完。
雜誌狗仔隊發現中居喺呢排開騷期間，經常患上感冒，呢啲可以歸咎於佢冇個女人喺身邊服侍，所以健康唔係幾好所造成。佢帶病在身重晚晚收工都唔即刻唞唞，同啲朋友玩到夜麻麻先返屋企。由於屋企冇咗個女人喺度，中居惟有轉玩博愛，狗仔隊就偷拍到中居有晚招呼咗班老友去佢屋企玩。聽聞佢因為得番一支公，重借埋地方畀草囗剛留宿㖭。
雜誌亦偷拍到中居錄影完《SMAPXSMAP》深夜返屋企，佢攞住一袋二袋，據說入面係節目食剩嘅嘢，之後佢就揸電動滑板去便利店買煙同溝酒嘅冰，睇嚟中居因為失戀，所以用煙酒解悶。