滙豐（005）業績雖佳，但獨力難支，大市高開低收，恒指一度高見10285，上升逾百點，但其他大藍籌不濟，行情遂由高位反覆走低，收市10177，更倒跌5點。
今個升浪，恒指去到去年12月初高位10247水平，好淡爭持頗激烈，暫時恒指仍能守穩在10日線（10096）同20日線（10084）之上，並形成上升楔形，若跌穿兩條平均線及楔形升軌支持（約在10000水平），形勢便會轉壞，要小心。不過，上升楔形亦不一定係利淡，若大市受消息刺激而衝破楔形上阻力（約在10300水平）便會出現急升，RSI升破降軌，背馳亦不成立。雖然大市最終都要作出中期調整，但恒指或會升越10500，甚至去到11000才掉頭，而個別股票的升勢將會更急。
圖表走勢處關鍵時刻，但芬佬基本上唔睇淡，強調只會調整而不會大跌。事實上，呢兩日唔見芬佬有大動作，間中只有小量的換馬操作。佢哋觀察所得，散戶呢一輪入市嘅層面已開始擴散，主要係國企同工業股接連創出新高後，唔少人鬆咗綁，又再追捧新對象。不過市內除咗呢類資金外，又確有新水入注，本港中資經紀行上禮拜就收到以億元計資金，其中有部份已入市，9成對象係國企股。
藍籌除滙恒外，大多出現調整，近期升得急的地產股，沽壓亦較重，新地（016）跌0.7元，更成為主力的拋空對象，長實（001）跌1.0元，新世界（017）更大跌0.25元，跌幅6.1%；嘉華國際（173）收0.82元，跌2仙。
嘉國走勢好靚，近期3次到頂（0.81元）而破，噚日出現後抽，整固完成再上，大升浪即可確認，量度上升目標為1.1元。
嘉國在中港發展地產，內地則集中在上海，主要項目由04年開始陸續完工，預期可提供可觀的盈利貢獻。嘉國大股東持有澳門銀河娛樂股權，在港交所（388）批准外地賭業來港上市後，市場已憧憬會有注資行動。從近期股價的強勢來看，相信注資有一天會成為事實，股價更會衝上高位。
郭兆誠