約活力先生食晚飯，佢話：「阿叔放假兩個星期去也，唔得閒睬你。」去邊度呢？原來去泰國布吉島，住在Laguna旁邊一間高級平房式酒店，平房內有睡房、浴室、廚房，活力先生話活力太太可以親自下廚，過一個悠閒假期喎。唔係嚇佢，煮一兩餐就冇所謂，超過四五日就覺得煩，因為去放假行街游水，重要掛住煮飯，一日三餐好有束縛感。
記得Laguna旁邊有兩間酒店Pusit與喜來登，前者平過後者，四周有人工湖、有沙灘、樹木青葱，住在其中，俗慮全消矣。
如果中咗六合彩或三T，可以更高級啲，去住Amanpuri嘅別墅，別墅全部有業主，其中有好幾位係香港商界名人，別墅可出租，每日租金甚貴，我哋負擔唔起嘅。當年有一間公司借過一間別墅畀左丁山住三日，四間大套房包圍住一個游泳池，池的前方有大廳，後方有高台，高台下係廚房，一位泰國女工人朝朝返工侍候，代往街市買餸煮飯。
嘩，朝早走出房間就跳落游水池，游幾個池就上高台處欣賞無敵海景，享受工人奉上嘅早餐，直情冇得頂，住咗三日，直情唔想走，可惜只得三日借用，延期要付租金（當年係一千美元一日），邊度畀得起呀！自此之後就冇去過，聽到活力先生去布吉，心都癢埋，可惜口袋唔夠銀，十幾年冇去過Amanpuri咯。
八月三十一日中三T嘅話，一定飛身撲過去。