大戶果然趁滙豐（005）業績靚，借好消息出貨，恒指高開101點後迅速回吐，全靠滙豐支撐，保持在10200至10240窄幅上落，尾市滙豐升幅收窄，恒指倒跌5點收市，報10177。
大行對滙豐超靚業績反應平平，大部份只維持中性投資評級，加上滙證唱淡地產股，恒指欲升無力，投資者見大市應升未升，亦沽貨減磅，因此大市雖微跌5點，但下跌股份539隻，而上升股份只有307隻。不過，港股昨日氣氛雖差，但仍守升軌支持，未失守前不宜過早造淡。
趙飛雲倉內股票價值亦縮水，早市見滙豐Call輪9845與正股背道而馳，在0.51元沽出計數。9845最後收0.44元，在滙豐上升1%下大跌12%，早前已提出警告9845由擴水轉為收水，就算睇好滙豐亦應考慮沽出換馬，之前隻輪在正股唔郁情況下連升多日，走勢並不正常，如今則在正股上升時大跌，有經驗玩輪的投資者應明白箇中原因。
香港興業（480）回吐亦急，跌5.4%，收1.74元。按原定部署在1.77元止賺。以昨日成交3千萬餘元計，興業應該未炒完，候震倉完畢伺機再上車。
其餘意科（943）以0.30元止蝕，重鋼仍以2.375元止賺，中旅則以1.34元止賺。
趙飛雲