掀起全城熱潮嘅西班牙足球勁旅皇家馬德里，今日現身香港，後日就上演表演賽，萬千球迷不惜通宵瞓街撲波飛。發展商夠晒靈活變通，索性搞買樓送皇馬「波飛」，促銷樓盤。
九龍倉上個禮拜六起，凡頭三名買尖沙嘴擎天半島或者深井碧堤半島買家，都可獲贈兩張皇馬門券。
佢哋賣樓部講，有市民上個禮拜去到擎天半島售樓處，表示想買單位，由於個樓盤同地鐵合作，向來要求買家要用信用卡繳付首期。點知，呢個準買家搞咗好耐都攞唔到張信用卡，搞咗大半日都係得個吉。
聽講，呢個準買家之前去過碧堤半島，用支票畀樓價百分之五，後來彈票，九倉賣樓部懷疑個客另有企圖，所以都係冇送波飛畀佢。
香港人買樓一向好豪氣，只要有示範單位同大廈模型睇就可以買樓，相比之下，內地買家就唔同，不論售樓處或示範單位搭得幾咁天花龍鳳，都一定要實地睇樓，佢哋搭籠𨋢上樓睇係好平常。
如果有興趣，會睇十次八次都唔出奇，有地產商話，據佢哋統計，每個內地買家最少睇四次樓先會買。第一次自己睇，第二次同另一半嚟睇，第三次帶朋友，第四次係同父母一齊嚟。有啲多過四次嘅，通常係着住拖鞋得閒嚟傾兩句睇兩睇，然後落槌買樓。
父母對子女嘅愛遠超乎你我想像，望子成龍嘅心願，令擁有名校網嘅沙田區住宅租務大升。家長睇樓活動，因為一場「沙士」而被打亂，令七月出現趕租物業現象。
利嘉閣地產新界區營業董事陳大偉報料，沙田第一城、帝堡城同駿景園，上個月租務成交特別活躍，其中帝堡城租務比六月多三成三，屋苑呎租約十一蚊，保持六月時水平，冇升跌。
據佢講，若非今年本港爆發非典型疫潮，影響學生上課時間，暑假同升學租樓旺季，絕對不可能喺上個月先出現，佢估計，八月租務交投會再升一至兩成。
七月份多個新盤推出，地產代理自然大豐收。美聯噚日派發七月份嘅成績表，共有八間分行佣金收入超過一百萬元，今次做得最好嘅係元朗教育路分行，佣金一百三十五萬元，第二名係山頂分行。
中原方面，有九間分行佣金破一百萬，排頭位係山頂南區，佣金一百九十萬，第二名係元朗教育路分行。除咗住宅部豐收，工商舖都好賺，佣金逾一千萬。
雖然最近豪宅幾旺，但去貨速度始終都係慢慢嚟，發展商仍然要時時搞吓動作，畀市場知道吓個盤重賣緊。
賣咗年幾嘅大埔滌濤山，嘉里建設不時諗到新橋，帶記者去睇吓佢個盤。噚日就同蘭西去睇咗個全新嘅複式洋房示範單位。嘉里吳美珊話，單位裝修係用咗日式加西式嘅意念，會有一種好舒適寧靜嘅感覺，裝修費超過一百萬。
至於滌濤山𠵱家重有不足六十個單位，賣晒可收多六億，呎價由分層單位三千五百蚊，至獨立屋嘅四千五百蚊。嘉里遲吓就會賣九龍灣企業廣場三期，𠵱家有客洽購五層樓面。
蘭西
電郵地址：