1/6個越南人楊嘉雯開越南菜館最緊要正宗風味，「喺香港我就未食過夠正宗又夠地道風味嘅越南菜喇，所以決定自己開番間，咁就唔使去越南先食到我最鍾意嘅地道越南菜式啦。」正如有1/6越南人血統嘅楊嘉雯所講，呢間越南菜館嘅菜式勝在夠地道，好似蝦仁涼伴燒茄子，就係Carmen專程到越南取經嘅越南地道菜。
記者：馬慶武 攝影：陳陶鈞
逢星期一至三、五出版
曾拍過唔少廣告、電影嘅楊嘉雯，太爺（即係佢爸爸嘅阿爺）係越南人，可能因為咁，Carmen由細到大都好鍾意食越南菜，去過越南旅行之後，除咗立刻愛上越南優美嘅景色，更體會到正宗越南菜嘅滋味。「去過越南食地道菜之後，返到香港發覺搵唔到一間正宗純正嘅越南菜館。」
Carmen話香港有好多越南菜館啲菜式都為咗遷就港人口味而「改良」，有啲更混入東南亞其他地方嘅菜式口味，係就係夠晒豐富，不過咁就變得唔夠越南地道風味。所以要開一間超正宗嘅越南菜館，希望以口味正宗夠地道為賣點。
「最愛係越南菜嘅酸酸甜甜，而且有好多冷盤，口味獨特又開胃。」Carmen就連飲咖啡都只愛越南咖啡，「越南咖啡唔會落糖，只係落煉奶，比一般咖啡苦澀，但極香濃。提神效用超強，臨瞓前千祈咪飲。」另外為咗堅持口味正宗又精選，餐牌上只有二十款菜式，重質不重量。
蔗蝦呢味經典越南菜都唔使多介紹喇，要講嘅係「芽莊」用嚟配蔗蝦嘅地道花生醬汁，用紅葱、花生、魚露等材料混合煮成，少少酸味多多花生香，配合外層金黃兼蝦肉充滿蔗香嘅蔗蝦，別有一番風味㗎。
Carmen話呢味燒茄子只喺越南食過，香港無乜人做呢個菜，係因為製作需時，先將茄子慢慢燒至乾身，再放入鮮蝦、豬肉、青瓜等配料再蒸，整足一個鐘。
較苦較澀嘅越南咖啡，記得唔使加糖，只要加入煉奶混和已經夠香夠滑。
淡水大頭蝦開邊加蒜茸燒，夠晒惹味，留意最滋味最地道嘅食法係加上用幼米粉壓成餅狀嘅「崩海」，再捲生菜點魚露食。
地址：中環威靈頓街88至90號地下
電話：25819992
營業時間：11:30am-11:00pm