呢個幾月香港唔知做乜？好似樣樣都同足球有關！利物浦痛數港聯6蛋、30幾度幾日幾夜排隊睇皇馬、賭波正式合法化……不過Game迷最關注嘅，都係《WinningEleven7》殺到！遊戲畫面、球員動作，可以用超華麗嚟形容！港人至愛嘅碧咸，遊戲內重係效力緊曼聯！筆者今日就教大家點樣「拗」佢過皇馬，砌出世紀至強球隊！
記者：朱崇德
逢星期一至三、五出版
對應機種：PS2
遊戲類型：SPT
遊玩人數：1-8人
開發商：KONAMI
售價：$398
售賣點：DreamStore
地址：灣仔東方188商場256號舖
一開Game只可以用超爽嚟形容，今集球員3D處理明顯滑淨、細緻好多，完全冇起角，球員動作依然全部以現役球星來做MotionCapture，齋睇傳球動作已經明顯複雜同華麗咗，腳面撥波、假傳球、拗身頂波等，都會喺運球時不經意做到，重吓吓嘭嘭聲，充滿臨場感，操作反應時間大大縮短。
遊戲亦加入真實個人化動作，好似朗拿度嘅180°向後挑波過頭、施丹搓波轉身過人，以往做特殊動作只要按住R2，今次特殊鍵改為右邊Analog，輸入動作指令可更多樣化，可惜右手指公呢頭轉去Analog掣、嗰頭又要去番○、△、×掣，操控射門又傳波，難度簡直係9.99！
遊戲模式基本同上一代差唔多，都係分為MatchMode、LeagueMode、CupMode、MasterLeagueMode。相信老手都知道，當中以MasterLeagueMode最緊要，事關佢有球員轉會功能，可以創製自己的夢幻球隊！不過要留意MasterLeagueMode的賽制今次有所改動，以往《WE6FE》要由D4升上D1先可以參加最終的WEFA盃賽，不過今次《WE7》只有D1、D2，所以無形中大家要反覆贏盃賽，贏錢買球員嘅時間，就可以稍為縮短了！
今集另一新加重要功能，可算係個WE-SHOP，玩家可以用打贏盃賽嘅錢（WEN），去這店內購物。購買選項共有13個，最重要莫如「球員自由移籍」一項。碧咸遊戲中仍是效力曼聯，如果你想將佢轉投皇馬，一定要開啟此功能，價錢係最貴嘅10,000WEN，須知每贏一場賽事，只係搵到50WEN，即係要贏成200鋪！碧咸果然身價不菲！WE-SHOP內重有好正嘅隱藏球員，賣價幾抵，150WEN就買到一個！全部都係經典中嘅經典，好似筆者最愛嘅老將奇連士文、芝拉華特同羅馬里奧等！