英格蘭國家隊領隊艾歷臣藉暑假就同女友享受度假生活，但佢亦不忘諗計，用罰款阻嚇講電話球員，等佢哋喺月中嘅國家隊訓練更集中精神。
原來英格蘭訓練期間，一直都有部份球員好似碧咸、史高斯同菲臘尼維利嘅手提電話不停咁響，唔可以專心練波，於是艾歷臣決定如果手電每響一次，就要向機主罰五十鎊（約六百二十五港元），希望每次練波或講解戰術時可以順順利利，呢個罰款制度會喺月中對克羅地亞友賽前實行。以呢個罰款標準，一向訓練期間手電響個不停嘅碧咸，平均每三秒就會被罰一次，但呢位「萬人迷」肯定唔會成為首位被罰款球員，因為佢唔會踢呢場友賽。我求大俠覺得艾歷臣呢招真絕，肯定可以收到阻嚇作用。
巴塞隆拿重組大軍之餘，一批舊將陸續被棄用，其中長居後備嘅巴西球員祖雲尼亦無法倖免，自由轉投到葡萄牙球會賓菲加，但巴塞今次決定，代價係要俾六百萬歐元「分手費」，加埋兩年前用二千萬歐元購入，呢筆錢對其他球會嚟講，的確唔小數目，但對巴塞可謂濕濕碎。
雖然唔少行內人認為拜恩單強姦案無論最後入罪與否，NBA嘅形象點都有損害，但小馬老細古賓，就認為從商業角度嚟睇，對聯盟有利冇害，因為係人對嫌疑犯都有好奇心喎。講嚟好似有點冷血，但實情唔會錯得晒，不過可能短期效益會勁啲，長遠發展始終唔係好事。
我哋體育版之前提過米杜士堡斟親人都幾乎唔掂。所謂衰開有條路，連國米棄將迪比亞治奧都話寧願留響意大利踢二線隊，都唔加盟呢間河畔球會喎。米記領隊麥卡倫以前都帶起幾個後生仔，與其成日俾人請食檸檬，不如比多啲後生仔落場好過啦。
NBA球星姚明前日嚟港準備今日打熱身賽，而好多記者都爭住問呢個小巨人，求大俠前日睇三色台體育新聞，見有記者唔知係咪有心考佢啲英文，咁明哥應酬講咗兩句。其實姚明上季第一季打NBA已經試過全程用英文接受一間雜誌式嘅電台訪問，傳媒朋友咁樣考人實在好膚淺！