滙豐（005）半年盈利勁升25%遠勝預期，但未能令大市出現挾淡倉情況，恒指最後倒跌收場，反映今鋪淡友實力唔弱，呢個8月相信幾難捱。恒指收報10177，跌5點，成交94.72億元。滙豐升得唔多，收報96.75元，只升1%，單是中移動（941）與中海油（883）跌幅，就幾乎抵銷滙豐嘅升幅。
e莉莎話，聽講班外資大戶噚日沽出大量化工類股份，唔知會否陸續有來？由於散戶仍對國企股有興趣，所以化工股冇乜點跌，但成交就明顯增加。北京燕化（325）升2.9%，收報1.41元，但較全日高位1.47元則回吐頗多，成交高達1.87億元。中石化（386）跌2.2%，成交逾1億元。
新怡（1094）急升8.1%後，下午中途停牌，有待公布股價敏感消息。有傳聞話公司被要求澄清上周五配股事宜，特別係承配人的身份；但亦有消息話公司可能進行配股。黑客話，此股可能被監管機構留意，日後或者唔易「發揮」。
合和公路（737）今日掛牌，傳聞話暗盤價4.30元，較招股價4.18元略高。不過，Cookie話呢類暗盤價唔可以信到十足，可能係有心人想托價而出口術，又或者係刻意製造嘅暗盤交易。
講真，如果此股真係咁掂，就唔使以接近下限定價，好多芬佬都覺得哥頓今次將招股價訂得好盡，PE亦頗高，短期水位十分有限，上市之後的中長線表現，就要睇港珠澳大橋項目發展權誰屬。
阿虎