坦白講，第一眼見到19歲的胡彥斌，雖然着上adidias、Nike及Levis，竟聞到一陣佬味，再者，他居然要去旺角上海街買古董表，頓時嚇一大跳？不過，當他用稍稍高八度的聲線說話時，青春味又飄然而至，尤其在表舖看到心水靚表時，燦爛無比的露齒笑容，非常可愛，令我彷彿也後生了N年！
記者：梁佩芬 攝影：周旭文
上海出生的胡彥斌(Anson)，每次來港都匆匆來、匆匆去，莫說衣服鞋襪，連雲彩也沾不到半片！不過，八卦的Anson每次都問同事，哪些是香港最「潮」貨色。今次，同事們無聊地講到古董表，原來今期後生一族最潮衣着配搭，居然是一隻價值數百元的60's古董表！Anson一聽，急不及待要睇睇，於是就拉大隊來到有不少老牌表舖的上海街！
Anson雖然鍾意古董表，但講到揀表竅門，都係要問問專家，就由老字號表行的負責人麥小姐為Anson指點迷津。麥小姐一看Anson，就說：「細路都係想買隻古董表玩吓，最緊要隻表襟睇，戴出街畀人讚有Taste！」
初時以為70年代風靡後生仔的依波路，以鋼帶最型，點知𠵱家後生仔反而鍾意皮帶，咁先至有古董味，所以，不少人都將隻鋼帶換成皮帶，而且要有點殘，才似番隻古董表。
驟眼一看，以為係價值幾萬的RolexSubmarine，原來只是80's山度士。80's山度士、依波路等牌子都經常模仿「勞力士」款式，尤其加個放大鏡係日期上面，驟眼看，激似度有九成！
表面通常都是平面的，而這隻Gotiar則呈拱形，比較特別。而且，除皮帶有懷舊味外，其菱形時、分針也甚古老！
通常秒針都是在時、分針中間，而60's則愛裝在表面下半部，俗稱「細三針」。因為製造非常困難及成本高，所以生產了一輪後，已經沒有再推出，碩果僅存，可能只得佢！
Anson心水表
聽完專家介紹，Anson終於有所決定，大家別以為大陸同胞都崇洋貪新鮮，原來Anson依然最愛用國貨，而且來港消費都不會忘記父母的一份。
睇完一大輪嘅Anson，始終對國貨情有獨鍾，選中70'S中國出口表，果然識貨。出口表是表身與表帶分開的，到舖頭才將兩者結合。今天，這類上鏈手表所餘無幾，賣一隻少一隻。手表全由北京及煙台兩地製造，買表更附送一條防水防汗的尼龍表帶。
Anson每次做宣傳，都會買些手信回家，孝敬當海員的爸爸及京劇名師的媽媽。麥小姐即刻推介呢隻金圈依波路，三十多年金色如新，全沒褪色情況，而且是水晶玻璃面，防水性能極高，出海遇大風浪也不怕！
Anson媽媽則愛手工精細的手表，這隻金表帶加人工搪瓷畫花的手表，甚有古典味道，又細細隻，可作時計，又可作首飾，一物二用，麥小姐稱，這類小巧的骰的搪瓷手表，是二、三十年代上海名媛淑女的恩物。
兩家老店
a.祐安錶行
地址：上海街425號地下
電話：23844854
b.亨得利表行
地址：上海街358號地下
電話：23889125