十四歲已代表港女足參加國際賽的邱嘉慧，過去多年曾有兩次機會到中國或南韓做外援，成香港女足歷史上首位輸出球員，但她最終因「唔想博」或者「唔敢博」，決定留港發展，在公餘時間始全情投入。
嘉慧說：「早輪去泰國踢亞洲盃嗰陣，有北京球會搵我，斟我加盟佢哋隊波。其實我早幾年前都有諗過去有職業嘅女足聯賽踢波，每日起身就練波，練完就瞓，瞓完又練，每個月搵兩三萬元月薪。」
目前在一間物業公司任職的邱嘉慧說：「講真做得運動員或者足球員，當然想去更高水準嘅地方比賽，以證明本身嘅能力，而如果當時決定接受邀請，重有可能做香港第一個外流嘅女子足球員。諗深一層，呢啲都只係虛榮。事實上，球員生涯好短暫，始終唔值得博，踢咗兩、三年之後，驚返番嚟可能會搵唔到嘢做，所以我寧願留番喺度，集中發展本身事業之餘，以業餘方式踢波同打籃球，咁樣可能長遠啲。」
嘉慧坦言，雖然香港女足發展了多年，只是缺乏長遠的發展計劃及目標，使這項愈來愈多女孩子參與的體育運動，無法進步，長期處於亞洲中下游。