特首果然搵唐英年做財爺，希望佢唔係大花筒。市場焦點除咗高官任命，滙豐（005）及恒生（011）公布業績外，樓市新九招仍係焦點所在。不過，就算樓市真如孫公所言，供應愈來愈少，經濟亦開始復甦，但政府一定要保持勞工市場的穩定性，樓市需求才可望復甦。
大市昨日受滙豐拖累下跌65點，收報10183，成交91.55億元。地產股表現則保持硬朗，二三線地產股持續勁升，麗展（488）與百利保（617）均升逾25%。由於滙豐業績理想，兼聲言可能調高派息比率，今日港股隨時來個挾淡倉。
新怡環球（1094）大股東上周五配售5200萬股，每股作價0.30元，分3批上板，兩手2000萬股，一手1200萬股。黑客話，今次作價折讓幅度高達22%，接貨人「道義」上唔應該即刻出貨賺差價，至少都要持貨兩三個月，甚至可能要幫手整靚個價，然後才出貨。新怡跌3.9%，收0.37元，好似連震倉都嫌費事。
國內建築股寶業集團（2355）獲得惠理基金垂青，增持股權至8.26%，消息推高股價7.14%，收2.10元。Cookie話。此股街貨極少，加上有基金增持，股價可能繼續被推高。
21世紀通（241）收購國內電訊增值服務項目後復牌，升12.7%，收0.71元，成交4320萬元。交易不涉及北京中信增持21世紀通，所收購的項目亦非國內重要電訊產業，與市傳公司將成為北京中信電訊業旗艦，有一大段距離。
阿虎