如無記錯，每次見到E-kids，無論春夏秋冬，都是着背心，露出六條幼長手臂，不求甚解，向成員Tommy查詢，他竟哈哈大笑：「咁都俾你發現，乜你唔覺後生仔着背心型啲咩？」身旁Alan再解畫：「我哋形象係跳勁舞唱快歌，唔通要由頭包到落腳先型咩？」最後連Tim都加入：「後生仔，梗係要Show肌肉，跳跳紮先得，唔係點叫青春活力！睇吓我哋，跳住食炸雞都咁型！」
記者：梁佩芬
攝影：陳智良、林栢鈞
第一次見E-kids，在他們觀塘排舞室樓下。突然，七部的士急速飆至，三秒後，迅速擋住大門口，這時三子施施然下來，見慣不怪，自動收禮物、簽名、合照、寒暄……勿以為只得五七三十五名Fans咁少，原來正從四面八方飛奔出來，傾刻間，大廈門口擠滿近百人！抓緊機會問他們偶像邊樣最殺，Fans們一致話E-kids舞勁兼有型，原來大家都好受背心Look。難怪佢哋出道年多，每次出Show勁歌熱舞，都必定要着背心，再者唔係咁着，手腳又怎可以前後左右亂揮亂擺？
既然佢哋嘅背心Look咁殺，今日一於叫佢哋傳授吓着背心心得。E-kids覺得，男仔着背心，唔使大大隻，當然好似任達華身形就最Fit，但後生仔練到成身肌肉都幾難睇，所以三子一致認為：「鋼條型，最有型！好似我哋就最好！」太HardSell啦！經他們嚴選，揀定了四款最啱廿零歲男仔着嘅背心。
三子最鍾意打籃球，一叫揀背心，二話不說就是籃球衫，原因呢？「型囉！透氣又鬆身，好舒服，做運動、行街、瞓覺、出Show都着得，簡直係入得廚房，出得廳堂！」
由NBA木狼隊加尼特（KevinGarnett）做代言人的And1，在美國知名度僅次Nike及adidas，每季都推出近二十款顏色的球衫，質料內外都用100%Polyester，出汗後都不黏肉，裌位又鬆，方便成日做大動作的E-kids。
不過，籃球背心一定要鬆身先着得有型，但自問身材不高又手臂幼過牙籤，就少着為妙。若要追上潮流，就要選少少貼身嘅款式，裌位啱啱好的圖案背心，唔會穿到「浪浪」吓，又可突出鋼條型身材，更可引死人！
除咗籃球衫裌位大外，一些㗎仔設計或70年代的美國貨都有個大大的裌位，適合啲鍾意着鬆身衫、又唔好打籃球的男仔，況且全棉質，可將瘦削身形變得豐滿一點，又索汗，夏天行街最啱！
今年另一大熱是民族服，男裝民族服就少啲，僅餘就是麻質地背心。質料輕，襯牛仔褲、短褲都OK，不像籃球衫般單調乏味！
E-kids都算是背心之王，但成日都只愛籃球衫，Fans睇得多都悶到死，所以經佢哋意見，決定佢哋最應轉着邊種背心。
店舖資料
a﹒M.V.P.
地址：旺角通菜街56號D
電話：23806160
b﹒Woodland
地址：旺角彌敦道602-608號Chic 堡Shop218
電話：21110130
c﹒PublicVoice
地址：旺角瓊華中心301舖
電話：23887366