皇馬人未到，卻搞到滿城風雨──為買波飛瞓街、一向同球迷相安無事的足總被罵、皇馬球衣大熱賣，是新加入的「萬人迷」碧咸號召力驅使？但誰敢說「哨牙仔」朗拿度、施丹、費高、魯爾，甚至是卡洛斯，不是叫座源頭。難怪連兩個平時不太「迷」足球的保齡小子胡兆康及張振中，也想在周五到香港大球場現場看比賽；一個想見朗拿度、一個要睇碧咸。
圖?文：徐嘉華
皇馬球衣提供：球迷世界
穿起皇馬波衫，手持皮球的「康仔」，可以有幾搞笑得幾搞笑，一時熟練地轉波，一時扮射球，又可以同Cyrus（張之洋名）扮搶波，希望可以同朗拿度合照一張。大他一年幾的Cyrus，非常「碧咸迷」，最想同碧咸唱K。今次難得同兩人談談足球經。
問：何時開始睇足球？
胡：中一由英超開始睇起，初初睇波，都是注意一些有名球會，曼聯是其中之一。世界盃就由九八年那一屆正式睇起，最捧巴西隊，不過那年輸了。上年都是捧巴西，終於捧盃。鍾意巴西是因為朗拿度，覺得他好勁，個人技術一流，隨時可以突破對方後衞。
Cyrus：我是在九四年（當時已移民加拿大）世界盃開始睇波，爸爸鍾意巴西，我就鍾意英格蘭，因為件波衫好靚，從那時起開始留意英格蘭球隊，後來碧咸出現又打起後，到九六年回港英超剛成立，就由有碧咸的曼聯捧起，往後差不多追足每一場曼聯波。
胡：除了世界盃，我不會瘋狂到深宵起床睇波。
問：你們有踢波嗎？
胡：中一時參加校內足球學會，老師選我踢後衞，但由於當時已打緊保齡球（小三開始打），沒有時間鑽研足球，時常覺得腳部控制不太好，足球踢得好麻麻，後來中二就無踢。鍾意睇足球，是睇球員的技術。
Cyrus：我差不多無踢過波，只是喜歡睇波。
問：真的見到皇馬球星，最想做甚麼？
胡：皇馬幾個球星都想見，碧咸、施丹都想見，但只能見一個，我最想見朗拿度，希望可以拿他的簽名及合照。
Cyrus：一定是碧咸，他給我的感覺是較似一個明星多過是球星，所以好想同他唱K，而且人人都說他的聲音怪怪的。他踢波不是好出眾，但好欣賞他靚仔又形象百變，又對太太專一，又好愛他的兒子。我不算太迷他，但是足球界最鍾意的一個。曾買過的三件球衣都是有關碧咸的，我快會買一件他過檔皇馬的二十三號波衫。
