早陣子,離開咗嘉信汽車(Kingsway)同香港車壇好一段時間嘅AndrewWong,最近亞Mark聞得佢又重出江湖喇!據知,Andrew今勻放眼中國北望神州,出任韓國雙龍(Ssangyong)汽車南中國總代理,負責統籌包括廣東、海南同江西等六個省嘅汽車分銷同推廣工作,掌管銷售同市場總經理一職,委實任重道遠㗎!然而,以Andrew響香港車壇有咁深遠嘅資歷,既深明歐洲及韓國汽車品牌嘅銷售情況,加上佢亦曾出任香港某大汽車刊物總編輯一職,相信響國內嘅人脈網絡,亦有一定透徹嘅了解㖭!據知,現時韓國雙龍旗下嘅Chairman同全新豪華SUV嘅Rexton,響國內亦有一定知名度同銷量,遲吓明年初,雙龍重會以自己品牌,響國內推售MB100客貨車;呢款曾經響香港以平治為名嘅車款,亦曾錄得好高銷量呢!睇嚟今趟Andrew響國內大展拳腳,定必有一番新作為㗎!