袁仁祥喺銅鑼灣新舖開張，星光熠熠，原本想搞新派舞獅助興，不過搵唔到猿人面具所以臨時取消。新舖開張當日，卻缺少一個重要人物，就係袁仁祥頭馬「潛艇表」。為袁仁祥賣命三年嘅「潛艇表」係祥哥嘅得力助手，喺圈中甚有地位，其他水貨舖都畀面佢。不過佢揀咗新舖開張當日lastday，甚有剃祥哥眼眉之意。未知係咪過檔。
袁仁祥已積極培養接班人，佢話冇登廣告請人，只喺舖頭貼出請人啟事，已一星期內吸引咗三百幾人見工，可想而知香港新一代已開始人浮於事。同時據佢講，自從佢冇做「月餅場」後，場內人流已跌咗唔少，所以「月餅場」已主動叫佢返去，祥哥大有可能短期內再戰月餅場。如果屬實的話，祥哥就係第一個同時擁有三間分店嘅旺角水貨佬，難怪行內稱佢為「水貨大亨」。