踏正四點鐘，滙豐（005）收報95.75元，跌1元，恒指跌65點。四點鐘過後，滙豐盤數公布，上半年多賺25%，靚過預期。倫敦滙豐初步反應係反彈2%，彈得未夠，有機會撲向「紅底價」，並帶動恒指向上移，10400-10500在望。
昨日推介滙豐Call輪9632，最高78仙，低收71仙，跌4仙，表面負溢價0.7%，槓桿率13.5倍。滙豐派中期息1.87元，以滙豐除息價計，隻輪實際溢價亦只係1.3%，有實際槓桿率13.2倍撐住，隻輪好抵買。隻輪9月10日到期，以到時滙豐見紅底價計，隻輪值1.20元，𠵱家上車，有7分錢利潤。
恒指收報10183，同上月中高位10236相差有限。中移動（941）昨收20.30元，跌15仙，同上月中高位21.60元比較，拉闊到1.30元。大市喺滙豐帶動下，氣氛轉好，芬佬啲錢又會掟落啲落後大藍籌，中移動有機會炒落後，吼Call輪炒，9861昨散7.4%，跌過籠，最值得博。
收租股因為REITs概念同埋摩記買收租商廈，風騷風騷，太A（019）逆市升40仙。昅住太ACall輪，不過冇乜得點揀，得兩隻咁大把，9877年底到期，輪價31.5仙，溢價5.6%，槓桿率11.9倍，成交少，咪搞呢件，要搞9660，明年1月到期，輪價46仙，溢價2.9%，槓桿率8.1倍，有14球易手，易買賣好多。
章盛