劉德華上周與二千五百名fans一同慶賀「華仔天地」十五周年會慶，舉行大抽獎時，有歌迷提議華仔送現金，華仔卻笑說：「一陣人哋以為我畀錢買歌迷呀！」有暗寸麥浚龍之嫌。
傳與劉德華不和的麥紹棠及麥浚龍（Juno）父子，早前捲入樂壇貪污案，上周華仔與二千五百名fans舉行「華仔天地」十五周年會慶時，華仔便似有暗寸Juno之嫌，令歌迷捧腹大笑。
當日到場的嘉賓有劉偉強、林家棟、杜汶澤及鄧肇欣等，華仔除親自向五十位歌迷派發十年紀念金牌外，亦預備禮物大抽獎，其間有歌迷大叫抽現金獎，華仔聞言即笑說：「嘩，𠵱家乜嘢環境，你哋重叫我抽現金獎，一陣人哋以為我畀錢買歌迷呀。」全場歌迷即時大笑，還力撐華仔說：「唔怕，人善天不欺。」
之後華仔又說：「不過咁，如果係嘉賓捐錢畀你哋抽，咁就唔關我事啦，係查都係查佢哋啦。」結果到場支持愛兒的華仔父親、家棟及劉偉強合共捐出五萬元作現金抽獎。
當日華仔一班fans還順道為華仔父親慶祝生日，而今年為華仔雙親結婚五十周年紀念，向來孝順的華仔正構思如何為父母慶祝這個大日子。
此外，華仔前晚在《新城國語力頒獎禮》中，取得五個獎項，問華仔可擔心在這敏感時期中，攞獎多令人質疑時，他說：「我怕乜嘢呀？我光明正大得獎，邊個怕攞獎可以唔攞，等我攞埋佢。」
