呢排香港氣溫熱到冇人有，唔少藝員拍外景都辛苦到鬼殺咁嘈，但無論佢哋點辛苦，都一定唔及無綫新劇《大唐雙龍傳》一班幕前幕後嘅工作人員。事關近日內地多個地方持續酷熱乾旱，幾乎破晒近年紀錄，其中浙江係受影響嘅地區之一。好不幸，《大》劇演員林峯、楊怡同吳卓羲等等，上個月就上咗浙江嘅新昌縣拍外景，日日着住古裝喺平均四十度高溫下開工，你話唔熱到甩肺就奇啦！
馮仁昭收到風，佢哋早喺第一日開工拜神，已經有一位叫做林影紅嘅演員中暑暈低，跟住陸陸續續又有幾個臨記中招，好似傳染病咁一個接住一個瞓低晒。聽聞林峯同楊怡佢哋喺外景場地企五分鐘，已經成件衫濕晒，流汗流到每日飲六、七支水都唔使小便。好彩佢哋住嗰間酒店冷氣充足，班演員一開完工就九秒九咁返酒店休息，邊度都唔想去，直情當酒店係避難所咁避，真係陰功！
陳見飛噚日同黃 而黃日華亦有出席記者會，問到最近無綫封殺合約藝人接受有線訪問一事時，佢就舊話重提：「當年拍《天龍八部》我唔肯剃頭，之後就冇得接拍電影《投奔怒海》。」
陳法蓉同鄭佩佩正身處杭州拍古裝劇，日日熱到嗌救命，四十幾度高溫重要着古裝，但點都唔夠之前佢拍一場火燒戲咁辛苦！陳法蓉話當時係拍一場火燒屋嘅戲份，佢同蔡少芬喺屋外逃生，現場地面有啲易燃物體，所以火勢好快燒到，陳法蓉呆咗喺度，好在蔡少芬醒目一手捉住佢即刻跑，咁先平安無事。
台灣藝人陳柏霖同桂綸鎂早前為電影《藍色大門》去東京宣傳，日本傳媒將陳柏霖比喻為「台灣的金城武」同「日本的木村拓哉」，搞到佢好開心，而拍檔桂綸鎂就擺出一副想嘔嘅樣整蠱佢，陳柏霖就話只係想做番台灣嘅陳柏霖。而日本影評睇完《藍色大門》後，讚陳柏霖係「最有潛力男優」，都幾搞笑。
任賢齊前晚喺紅館出席「新城國語力頒獎禮」，小齊嘅耳仔一向都有事，佢啱啱去完新西蘭做演唱會，跟住就搭飛機返嚟香港，本來耳鳴嘅情況已經好嚴重，但佢前晚重要坐喺台前，所以早有準備，帶定個耳塞去赴會，咁就舒服好多，小齊話：「如果唔戴就會好痛。」
