長實東涌映濤軒嘅HelloKitty主題示範單位，擺滿色彩繽紛嘅精品家具，一向好受歡迎，不過，長實郭子威話，驚住大家睇厭咗，會覺得悶，HelloKitty會功成身退，示範單位會換新裝，所以特別訂咗個大蛋榚，噚日慶祝HelloKitty「榮休」。
示範單位要大翻新，裏面嘅精品同家具當然唔會浪費，發展商已經諗好善後安排，推出一個「送舊迎新」計劃，將示範單位分為六區，包括廳、廚房、洗手間同埋三個睡房（每個房一個區）。
由即日起至禮拜日，買家可以參加抽獎，四房單位買家有三次機會，三房買家兩次，兩房一次，抽中可以帶晒其中一區嘅精品返屋企。此舉除可以𠱁吓買家，重唔使費神搵地方擺放啲精品。
雖然話豪宅市場氣氛好轉，但係發展商想去貨快人一步，通常都會搞吓獎勵計劃，用「重賞」去激勵代理。何文田君頤峰，據聞發展商搞咗個「百萬元」獎金比賽，今個月起，邊一家地產代理首先促成五十宗成交，就可奪得一百萬獎金，限期係今個月十五號。
不過，呢個盤屬於中高價新樓，樓價由五百幾萬至過千萬都有，要喺兩個禮拜內做到五十宗成交，認真考功夫。個盤有七百伙，聽聞要做滿超過三百二十一間，佣金先至升到兩個巴仙，頭一百六十宗佣金都係得一點二五個巴仙。
另一邊廂嘅長實，正計劃再度推售同係豪宅級數嘅畢架山一號「拗手瓜」，會唔會上演豪宅爭霸戰就未知，但係市場焦點就可能會分散咗。
住宅樓價下滑、交投萎縮，代理佣金收入隨之減少，但商舖物業卻大旺，中原地產上個月工商舖做到五百一十萬佣金，係今年單月最高，重係九七年金融風暴以嚟新高。
中原商舖部總經理潘志明話，成績咁好，因為舖位租金回報率較其他物業如寫字樓、豪宅物業高，一般有六至九厘，投資者積極吸納舖位物業，交投活躍，生意多咗，佢哋收佣自然水漲船高。
據佢透露，今年佢哋簽多咗商場租務代理，都係帶挈商舖部佣金突破五百萬關口主因之一。以天水圍俊宏廣場租務代理為例，收咗六百萬佣金，當中大部份已經喺舊年入帳，其餘今年入帳。
樓市走勢係點，二手市場係重要嘅指標。美聯物業就做咗個「現樓轉手動力指數」，去反映二手市場嘅活躍程度。指數係以二手物業成交佔單位總存量嘅百分比計算出嚟，指數愈高，買賣愈頻密。
不過，屋苑規模有大有細，伙數由幾百伙到上萬伙都有，單幢樓伙數少好多。例如幾千伙嘅大型屋苑，就算成交量多，相對屋苑單位總數嘅百分比就可能唔算高，指數就未必高，甚至有可能低過啲只得幾百伙嘅細屋苑。
至於同行嘅中原地產，幾年前已有呢類數據指標，叫做屋苑二手流通比率。
發展商搞記招，最關注嘅係有幾多記者出席，通常早幾日就打電話問人數，不過多數唔會有答案。因為大部份報館會喺截咗稿後，先至處理第二日記者會嘅人手分配，搞得嚟已經係九點幾，發展商已經收晒工，想預早知道都幾難。比較細心嘅發展商，會喺記招當日打電話畀各家報館跟進出席人數。
唔多搞記招嘅華人置業，細心之餘重好醒目，噚日下晝為上環新盤開記招，朝早先打電話問人數，唔使花太多時間就有確實答覆，方便自己又唔會麻煩人哋，值得一讚。
講開呢個盤，比較特別嘅係地契年期長達999年，即係唔使交相等於應課差餉租值百分之三嘅地租，少數怕長計，一年都慳番唔少。
香港呢幾年嘅地產新聞，都係講緊負資產問題未能解決、政府要出手救樓市，重有大批樓價跌到慘不忍睹嘅勁蝕成交。
讀者何先生則來電，佢話不如報導吓令人振奮嘅消息，就係澳門樓市。
呢位讀者係香港人，𠵱家中澳兩邊做緊兼職講師，佢兩年前用七十八萬蚊，喺澳門黑沙灣買咗個二千呎海景單位，最近有個外籍客，出價一百零五萬洽購，物業升咗三成半。
何先生話，其實澳門整體樓市都升緊。遲吓澳門新賭場開業，同港珠澳大橋起好通車後，市道會重好啲。睇嚟除咗內地，遲啲真係要報道埋澳門樓市至得。
蘭西
電郵地址：
