私人貸款行尊N先生與朋友食飯，搵埋左丁山做陪客。N先生嘅辦公室就在新鴻基中心對面，所以「海都」就係N先生嘅飯堂，N先生叫左丁山去「海都」喎，自然即刻應承啦。一入門口就見到李國寶國章兄弟嘅媽咪在座，李媽咪胡紫霞女士精力過人，八十幾歲咯，仍然到處行走，非常活潑，唔怪得佢兩位公子都咁好活力也。
N先生在東京一橋大學讀碩士，可謂出身名校，今日日本失業率高企，大學生搵工艱難，與香港畢業生差唔多。N先生話當年：「六十年代後期，經濟蓬勃到不得了，每年春季，啲大商社就派啲職員返回母校招募，譬如一橋畢業嘅職員返一橋搶人，東大嘅就返東大，我在一橋校園就成日畀師兄截停，問我肯唔肯去見工。現在差得遠咯，只有嗰啲名校——東京大學、京都大學、一橋大學、慶應、早稻田、上智（SophinUniversity）、ICU（國際基督教大學）呢七間嘅學生，唔係好使驚失業，其他就難講。」
當年好景，都唔知幾時至見得番，實在為之傷心，日本如此，香港亦然。N先生操極流利日語，每年都見吓啲申請去日本交換嘅大學生，佢慨嘆香港學生學日文大概不得其法，會話好唔掂，去到日本有排先至搞得好。但係香港每年又唔係有好多學生去日本留學噃，N先生話送仔女去日本讀書，未必蝕底㗎。