近排幾乎炒乜股都賺錢嘅經紀黃，終於遭遇滑鐵盧，佢認購由前證監會主席做老闆嘅創業板新股環球數碼（8271），竟然首日掛牌股價就大插，有關包銷商完全冇出過嚟維持秩序，經紀黃情急之下，在接近全日最低位沽清貨，所以心情甚差。
環球數碼表現認真肉酸，招股價1元，但噚日第一口成交只係0.95元，收0.84元，較招股價低16%，成交金額1211萬元，完全唔係乾跌，全日只見獅子證券係咁沽貨，真係令人氣餒。
經紀黃話，經過反覆思量，覺得今次中招嘅原因同好多行家一樣，都係受到隻股老闆大名所累，以為實有唔少人幫手，所以先至走去捧場，查實隻股真係冇人維持秩序。小初心諗，人哋係監管機構出身，又點會搵人維持秩序，招人話柄。
屋漏兼逢夜雨，經紀黃愛股之一新灃集團（1223）上周停牌至今，仍然未有聲氣，佢話可能係因為股價升咗好耐，但旗下持有股份嘅Converse被Nike收購的消息，則遲遲未公布，所以被人抽秤。
慕容小初