近年第一身射擊遊戲愈見重視隊制戰略和據點攻守等軍事元素，當中如《Battlefield1942》和《PlanetSide》便獲得玩家高度評價，惟真正可供戰略型玩家發揮的空間仍未算太多。試想假如能將第一身射擊和即時戰略合併，發展出一套RealTimeStrategyShooter（RTSS），效果會唔會好好多？由S2Games開發的嶄新作品《Savage》，將可帶給你一個滿意的答案。
文：方樂鵬
對應機種：PC
發行：iGames
開發：S2Games
預定發售日期：2003年8月26日
在《Savage》之中無論選擇人類或獸人陣營，玩家都可選擇扮演指揮官和士兵兩種職業，假如以指揮官身份登場，遊戲便會以傳統RTS的Top-down視點進行，比起使用第一身視點作戰的士兵，自然能更有效地觀看戰局。雖然在對戰中雙方部隊多寡全由參與玩家人數決定（最多60人），但並不代表指揮官可以好得閒，你必須在有限的工人（最多10個）支援下，盡快搜集各種資源和黃金來建設各類型的研究設施，從而強化攻守力量。例如為士兵提供新武器（或魔法）、將原本只能發射弓箭的Tower加裝榴彈炮和能量防禦網、建造投石車及攻城器械等等，加埋擬定戰略和執行的工作，難度比起真正RTS可謂毫不遜色。
至於實戰方面，扮演士兵的玩家同樣好多搞作。首先單是兵種選擇上，遊戲便有輕、中、重型三款可以揀，視乎你喜歡速度型或攻擊型進行挑選。除了和敵軍廝殺之外，在遊戲的版圖上還會出現各種中立的AI怪物，鎮守着礦山和各個重要據點。只要成功將牠們殲滅，便可獲得經驗值和金錢。隨着EXP累積升級，角色的體力更會得到強化，令你在戰場上更具本錢。
講到呢度，相信大家都會問同一條問題：「指揮官如何令其他扮演士兵嘅Player甘心聽命？」
答案好簡單，正如先前提到，玩家所扮演嘅士兵等同RTS中嘅Unit，所使用嘅武器（或魔法）等級並唔係自己去決定，而是取決於指揮官如何運用資金發展技術；同樣地士兵在作戰中的表現，亦將直接影響軍團的資金進帳。假若缺乏財力強化武器，當敵軍Upgrade到人人用PlasmaGun，而你重係靠支散彈槍，肯定唔會好玩得去邊。故此若要在戰事中取勝，指揮和行動雙方都需要充份合作，否則只會處於捱打的悶局。另外，由於士兵購買軍備的資金將由指揮官配給，一旦用晒筆錢又想再買嘢，指揮官便會收到訊息是否准許過數，完全掌握財政大權，咁搞法身為士兵又點可以唔賣命？