四人組合EO2的童年可謂各自各精采，皮膚白皙的彭懷安（Eddie）常被誤認是女孩子，而謝凱榮（Eric）和洪智傑（Osman）自小已是左鄰右里，二人玩捉迷藏時，就因使出壁虎功而踩爆人家的馬桶，十分百厭。
東魅四人組合EO2成員Osman及Eric，小時候住在觀塘徙置區，徙置區拆卸後，二人遷往公屋，竟又巧合地再做鄰居，相識超過二十年，感情自然深厚。
日前EO2接受本報電話訪問，Eric說：「我媽咪同Osman嘅媽咪係雀友，佢哋住正我隔籬，所以我哋細個嗰陣成日一齊打籃球、踢波同游水，我哋成班又會熄燈玩耍盲雞，又扮《聖鬥士星矢》入面個雅典娜，有次有人嗌咗一聲『無限莫強求』嘅招式，一腳踢埋去，跟住有人碎咗手臂骨。」
Eric還說：「Osman細個叫『賤肉橫生大隻仔』，佢天生好大隻，我就戴副好大嘅眼鏡，叫『十六比九四眼仔』」Osman就說：「我哋好鍾意玩捉迷藏，有次熄燈玩，我哋個個好似壁虎咁爬牆，後尾跌落嚟重踩爆人哋個馬桶㖭！」
花名港督的Eddie則說：「我細個時啲人叫我做港督，因為我原名叫彭迪安，同彭定康個名差唔多音。以前媽咪好鍾意畀芝麻糊我細妹食，所以我細妹皮膚好黑，我就飲鮮奶，所以我就好白，啲人以為細妹係男仔，我係女仔，所以我大個之後，要男性化啲！」
王志安（Otto）小時候亦十分頑皮，他說：「我由三歲到五歲，踩爛咗七部單車，有次喺屋企碌架床上面碌落嚟，但我竟然一啲事都冇，不過就死咗隻雞，因為媽咪要劏雞還神。」
採訪：朱芷瑩
