同為亞視藝員、同劇演出的戲也有六、七套，如《影城大亨》、《萬家燈火》等，但珈潁跟謝雪心兩母女偏苦無對手！沒相干，原來私底下母女經常會下廚，而且合作無間，極有默契，大家口味亦相近。見珈潁真人比上鏡重靚，原來都跟食素有關。
記者：吳佩璇
攝影：陳陶鈞
想不到靚女珈潁從小的皮膚是又黃又黑，而且經常出現敏感、脫皮。「記得細個食芒果，個嘴附近就會甩晒皮！食蝦又係咁。有次媽咪啲朋友送咗啲波士頓龍蝦畀我哋食，食完之後成塊面好似灼傷咗咁！」到了十二、三歲，戒吃紅肉，皮膚開始變得白滑。直至三年前，更改吃長齋，連皮膚敏感的問題也沒有了！連心姐也受女兒影響：「佢成日灌輸畀我聽人嘅牙齒係唔使食肉嘅，我諗落又係喎。」
除了食素，珈潁亦奉行睡前6小時不進食的習慣，而且一日三餐盡量早吃，以免食完唔消化。至於心姐，原來得閒就會生食青瓜仔來養聲。說到開聲，她提議飲檸啡：「檸檬溝咖啡夾埋嘅味道似檸樂，幾好飲，有開聲提神作用。」但無論吃甚麼，自己煮才是重要，珈潁話：「我好鍾意煮嘢食，因為只有自己先最清楚自己嘅口味。」
木瓜湯好多人都有煲，但珈潁就靠素瘦肉來吊味。素瘦肉煲湯，食落不但更清，而且家陣的素肉，味道像真度很高。因為心姐及珈潁兩母女常到寶蓮寺上香、食齋，此湯乃她們在寶蓮寺飲過，回家後學煲的。湯內的材料樣樣補益養顏，好似雪耳含骨膠原、合桃補腎、木瓜滋潤補胃，是一味做法簡單而又功效多多的湯水。
用咩料：木瓜1個（中型）、雪耳2朵、沙參少許、合桃2両、素瘦肉5両、薑2片
不說不知，心姐原來好喜歡看電視烹飪節目，小炒（如炒牛肉）更是她的撚手菜。不過為配合囡囡珈潁的飲食習慣，心姐今日就炒了碟素菜。其中加入了她本人非常喜歡吃的冬菇。其他材料也以健康有「營」為原則。好似含豐富維他命的紅蘿蔔及含大量鈣和鉀的西芹。
用咩料：紅蘿蔔1條、西芹1棵、冬菇10粒、素火腿4片、薑2片
好易煮：
1.冬菇浸洗乾淨，起蒂切條，並加豉油及糖適量吊味。
2.全部材料洗淨，切條。
3.爆香薑絲，先下紅蘿蔔及西芹兜炒。再下冬菇，可加約2茶匙糖及少許鹽調味。並加水冚蓋略焗，最後才下素火腿兜勻便成。
試食報告：好友懷鈺
佢哋兩個真係好犀利，煮素食都好有味，入口唔似食緊齋，而且兩味餸都有養顏作用，尤其係個湯，又清又潤。