原本我求大俠覺得阿積士四角賽個賽制好混亂又難明，甚麼贏波有分、入球又有分，重要唔係單循環，每隊又只係踢兩場。但前晚睇完阿積士對國際米蘭之後，終於都發現呢個「騎呢」賽制好可愛！
前晚頭場賽事結果加拉塔沙雷贏利記二比一。以正常計分制度，當時加拉塔沙雷兩戰都係得三分，即係話國際米蘭對阿積士只要唔輸波就封王，又或者阿積士只要小勝亦能後上奪標！
不過呢個賽制就入球都有分計，結果阿積士就焗住唔能夠小勝對手，國米亦無辦法死守，兩隊都要鬥攻。下半場阿積士領先到二比○之後，兩軍仍然全情投入作戰，無出現過「拉布」或者死守場面，精采過打決賽，真係睇到我求大俠拍爛手掌！
講開阿積士四角賽，國際米蘭對阿積士嘅焦點，當然係身穿國米球衣首次倒戈嘅雲達美迪啦！不過喺呢場比賽先踢左翼，後改打右邊嘅雲達美迪，表現一般，教練古柏重話雲達美迪需要時間適應。我求大俠話邊關事吖，佢對住班舊隊友，熟晒啲路數，梗係發揮得唔好啦！
另一場四角賽，利物浦對加拉塔沙雷踢到起火，美拿同埋謝拉特喺下半場重做埋「紅牌阿姑」！佢哋嚟香港威風八面，返到歐洲就搞成咁，真係欷歔！不過領隊侯利亞都攞番多少分數，以法國人身份提醒英格蘭人，喺嚟緊歐洲國家盃外圍賽對土耳其一定要打醒精神喎！
以前被視為唔識入波嘅科倫，雖然上場對祖雲達斯時「故態復萌」，對住空門射失，但噚日對巴塞就表現勇猛，把握兩個入波機會，真係要讚番次。總結佢美國之旅四場入四球，同隊友雲尼斯達羅平分春色，如果佢返到歐洲後都保持呢種水準，曼聯躉唔使愁囉。
曼聯領隊費格遜似乎對黑人球員情有獨鍾，繼早年為大家帶來「黑雙煞」組合後，近年增兵亦簽入了科東尼、迪查巴等。噚日本報大事報道嘅阿積士後衞查比斯，已接近完成收購階段；加埋最新傳出嘅目標前鋒迪科，亦都係黑人球員，睇嚟呢股「黑旋風」喺曼聯重有排吹喎！