7.1大遊行之後，自由黨肯定成為了最大贏家。
首先黨主席田北俊無端端做咗人民英雄之後，自由黨嘅支持度立即急升，由五月份嘅百分之二點三，升到七月份嘅百分之六點七，即係升咗近兩倍，你話厲唔厲害。
呢個數唔係八方作出嚟，而係中大王家英做嘅調查結果，梗係夠權威；反觀民主黨，都只不過係升咗兩個百分點，由百分之十六點七，升到十八點七。
田少更加高興嘅係佢哋跑贏埋民建聯，唔講唔知，民建聯嘅支持度由五月嘅百分之六跌至得番百分之四，都咪話唔慘情。
如無意外，唐英年呢個星期會更上一層樓做財司，田少簡直係飲得杯落。
其實田少一直最擔心嘅係民主派人士執政，會損害商界嘅利益，搞到班生意佬冇啖好食，咁𠵱家自由黨嘅唐少當大掌櫃，一定唔會犧牲佢哋嘅利益，實在重好過佢自己坐喺行會多多聲。
所以話呢，「塞翁失馬，焉知非福」。
傳真︰2623-9278
電郵︰