內地物業質素近年不斷提高，好多示範單位布置與品味，都追得上潮流，唔似得以前，一係就老過阿爺嗰代，又或者豪華得滯，金碧輝煌到眼都睜唔開。
內地尤以深圳新盤最接近香港人口味，示範單位裝修要幾潮有幾潮，至於其他珠三角地區，好似中山、東莞、番禺等，一啲香港人最受落嘅老牌屋苑，新一期示範單位都有品味咗好多。
好似祈福新邨最新一期天湖居，示範單位就有唔少驚喜，好似浴室企缸位，整咗個魚池，廚房大半幅牆，偷空變身成巨型魚缸。
牆身做魚缸，香港新盤都見過唔少，但係就好少做得咁巨型，無他，國內一千呎樓隨時大過香港千五呎單位，裝修都可以發揮得更盡。
原來𠵱家唔少國內大型新盤示範單位，都搵香港過江龍設計師操刀，唔怪得創意強咗咁多啦。
華人置業嘅上環ManhattanAvenue，早排傳出有基金全幢洽購，未知結果如何。但若果發展商最終係分拆出售，聽講好多人都有興趣，啲客大部份想買嚟收租。有代理就話，睇怕呢個盤都唔憂賣，分分鐘會係對面荷李活華庭翻版。發展商今日會開記者會，講講個盤嘅最新情況，大家要留意嘞。
ManhattanAvenue係單幢樓，總共有七十五伙，面積一律約五百五十方呎，兩房間隔。發展商拆售意向價每方呎四千三到四千五百蚊。
暑假未完，月餅又未食，重有萬聖節未過，但已有地產商表態，提早為商場大搞聖誕節宣傳活動。
長實趙國雄話，今年零售業經歷一段艱辛日子，佢哋過去幾個月，已經喺旗下商場，舉行唔少以各國特色為題嘅宣傳活動，成效都唔錯。
𠵱家諗住提早喺十一月中，為商場做聖誕宣傳活動。佢透露，今次將動用一千萬，多過去年少少，多咗幾多就無可奉告。
重有成個月先到中秋，但已經有唔少月餅廣告排山倒海咁提醒你，連地產界都已經着手利用中秋節造勢。
率先出招嘅有利記，由即日起到下個月十一號，凡透過佢哋購買深井海雲軒，其中三名買家有機會得足金月餅過節，價值一萬五千大元。價值事小，最緊要意頭好。
美聯物業成立嘅美善會，趁住學校放暑假，日前搞咗個兒童暑期活動，由美聯義工隊帶領基督教勵行會五十名小朋友，去海洋公園玩一日。
雖然正值夏日炎炎，活動當日重成三十三度高溫，但小朋友大部份都係第一次去海洋公園，心情特別興奮，烈日高溫都唔在乎。喺海洋館參觀海洋生物時，重開心到「哇哇」聲。眾義工睇見佢哋咁開心，咩辛苦都唔記得晒。
呢類義務工作，雖然唔會帶嚟佣金收益或獎項，但係美記就希望，透過呢種咁有義意嘅活動，凝聚同事們樂於助人嘅熱誠，並應用喺生活上。
蘭西
電郵地址：
