馬主H到鏞記四樓食晏晝，坐在入口旁邊，係人行過都睇得見，當然別人亦睇見佢與靚女傳訊總監坐埋一齊談天說地。鏞記乃名人飯堂，將近兩點，要埋單之際，見馬時亨局長現身，原來佢在房間內請客，有人問佢：「會唔會接任財政司司長職位？」馬局長即時閃了。
馬局長都咁準時鬆人，馬主H自然亦要趕返工，唔好咁懶啦。點知一叫埋單，夥計話：「埋咗咯喎？」咦，邊位大哥請客呀？原來又係西門（Simon）公子。西門公子經常喺鏞記四樓打躉，見到老友記就會搶住找數，計埋呢次，馬主H估計西門公子已為佢埋咗四次單，覺得非常唔好意思，一定要請番西門公子一次至得。
馬主H落到樓下，只見何志平局長與蔣麗莉博士講緊拜拜。好一個蔣博士，先至生完冇幾耐，又試腹大便便，蔣博士笑到花枝招展：「當奴都話我好有生產力，要畀個人口政策獎我，又有人話要提名我做生產力促進局主席㖭！」當奴即係負責人口政策、清潔全城以及語文程度嗰位司長，香港人口出生率低到全世界最低之列，所以當奴好鼓勵女士多生產。蔣博士喺生產力，未算第一，如果當奴要頒一個人口生產力獎，要頒畀林超人屈穎妍夫婦，呢對夫婦三年抱三（實計數未足三年），打破一切朋友嘅紀錄，林超榮其實最有資格做生產力促進局主席！