話說在大球場現場觀看利物浦對港聯，港聯為了答謝香港球迷的錯愛，又係用嗰招郭家明話齋「穩守突擊」，於是乎港聯加埋利物浦二十多個球員便擠在一個半場，迫過行年宵市場買年花。奧雲仔的必殺技是快放一段入禁區射門，但迫成咁，莫講話快放，想行大步啲都驚撞親人，所以平時在英超聯睇見嗰啲中路放個直線入攝，又或者雙翼齊飛轉方向落底線斬中娥眉月球不着地怒射，統統欠奉，雖然利物浦最後都交足功課入咗六球，但其實全部都係啲「的的𢭃𢭃」係咁意射門，射得靚但不見組織，所以其實唔係咁好睇。
皇馬快要來了，足總步了特區政府後塵，低估了上街市民的數目，終於預售門券方面搞到一鑊粥，相信原本以為大安旨意留咗門票嘅人今次都凍過水。
皇馬牌面已有六條A，其他嘅都起碼係ＪＱＫ，希望今次香港派出球員唔好以凍結對方球員同埋交換心水球員球衣為第一任務，希望顧多啲球迷嘅感受，畀多啲空間球員走動及發揮，唔好再廿幾人迫埋一堆，實在好冇癮。輸波係預咗，若然你想激發香港市民士氣，就算入唔到波都多啲起腳射門，你話若然射入一粒，就算輸100比1，都令人高興。
重有，希望唔好再試陣，係咁換人落去踢但又踢不出一個所以然來，不如畀心機練波，有隊形地踢場好波睇吓，若然係要換，不如換啲有娛樂性嘅球員，例如阿麟志偉霆鋒任達華等，就算踢得唔好都起碼有得起吓哄。