乜嘢叫做口同鼻拗？拜仁同拉科咪係囉！呢兩間球會為咗馬卡爾嘅轉會，搞足成個夏天。
最新版本係拜仁話已經同意同馬卡爾簽四年約，只要拉科點頭馬卡爾就可以過檔，會長路明尼加及經理漢尼斯都係咁話遲早會掂；但拉科就發表會方聲明話，拜仁根本從冇黑字白紙畀過佢哋，要求羅致馬卡爾過檔……
不過我求大俠就諗，拉科啲說話既然係官方嘅，應該可信啲，但係拜仁就真係兒戲啲噃，查實拜仁向嚟喺德國球壇惡慣，但係唔代表你可以喺國際球壇夾硬嚟，想搞到馬卡爾走梗。呢單嘢睇嚟重有得拗，希望呢兩支強隊可以快快手傾掂，否則真係悶死人！
有大財團話要喺啲英超大球會嘅主場外面設立投注站，方便球迷落注，又引嚟好多衞道之士反對，但係已經轉會華素爾嘅前阿仙奴球員麥臣就舉腳贊成。如果球迷唔善忘嘅話，都記得麥臣以前係病態賭徒，佢𠵱家咁講嘢，好似話畀大家聽佢重未好番噃，華素爾今次頭痛嘞！
噚日甲A波深圳健力寶主場對大連實德，個個都以為主隊幾名龍之隊成員，星期六至喺北京對完皇馬應該唔會上陣啦！賽前梳打埠更加有人落重注，打到實德由平手到臨場一度要讓半球，點知主隊有李瑋峰及楊晨等人全部正選，最後重迫和實德○比○，原本平手捧實德嘅唔使輸，𠵱家就……
中田英壽𠵱家一面話喺帕爾馬好happy，又話如果有大球會斟佢，佢又來者不拒；我求大俠相信前面一番話係門面說話，之後嗰啲先係真嘅。事關帕爾馬踢唔到歐冠盃，中田𠵱家重同球隊拗緊佢喺隊中應該踢乜位置，真係拗足一季，不如索性去第二度發展冇咁嬲。
米高佐敦九六年拍嘅《太空也入樽》，近日俾《體育畫報》選為歷來最差嘅體育電影，話呢套片冇內涵；但我求大俠認為呢套係迪士尼卡通，對象都係以細路為主，咁睇得開心得意咪得囉，唔通要講深度咩，如果話差，我認為湖人嘅奧尼爾拍嗰幾套票房毒藥嘅爛片咪重渣。