細價股炒風熾熱，所以膽生毛及消息多嘅經紀陳頻頻報捷，雖然佢以短炒為主，但由於密密食胡，計落條數都相當和味，小初同佢雖然係好朋友，但難免有多少眼紅。
好似上個月中，佢推介中國星（326），話適逢批股又遇上CEPA，炒味濃郁，可以捧場，結果隻股真係一條氣咁升，上周五再斬四両，升3.49%，收報0.89元，成交則愈嚟愈大，有成1837萬元。
中國星上月中以先舊後新方式，每股定價0.52元，配售4570萬股，集資淨額2310萬元。上周五收市價已較配股價高出7成，有貨者真係賺到笑。
經紀陳話，裕泰興太子爺近排表示有意發展電影市場，搞拍片大計，而合作夥伴係中國星。據講佢重身體力行，買入咗唔少中國星股份，唔知上次批出嘅股份，佢又有冇份認購呢？
小初問中國星重有冇得諗？經紀陳話，雖然消息似乎一浪接一浪，但隻股炒到現水平，累積升幅大，短期上升水位似乎有限，如果有貨可以睇多一陣先食胡，但𠵱家先追貨，則唔係咁值博。
慕容小初